Мінчук выкладваў у TikTok і Telegram відэаагляды крамаў — у адной з іх у яго здарыўся канфлікт з супрацоўніцай супермаркета, якую блогер вырашыў «праславіць» у іншых роліках. У выніку жанчына і яе дачка сутыкнуліся з абразамі, а мінчук стаў фігурантам крымінальнай справы, паведамілі ў Следчым камітэце.
У канцы кастрычніка мінулага года 32-гадовы мінчук «актыўна развіваў сваю блогерскую дзейнасць у Telegram і TikTok», паведамілі ў СК. Ён рабіў кантэнт пра розныя харчовыя крамы і паказваў сваёй аўдыторыі, як супрацоўнікі гандлю нядобрасумленна ставяцца да працы.
«Асноўнай мэтай фігуранта было знайсці пратэрмінаваны тавар, парушаную цэласнасць упакоўкі прадукту або зладзіць скандал з нагоды недастаткова „чыстай“ гандлёвай зоны», — лічаць у СК.
Чарговы ролік мінчук здымаў у краме адной вядомай сеткі.
«Каля прылаўка са свежай гароднінай і садавіной „народны рэвізор“ пачаў паводзіць сябе задзірліва: ён прыцягваў залішнюю ўвагу наведнікаў, адцягваў супрацоўнікаў ад працы. На гучныя выказванні пакупніка адгукнуўся персанал, які паспрабаваў разабрацца з канфліктнай сітуацыяй. Аднак добразычлівы падыход мужчыну не задаволіў», — расказалі ў ведамстве.
Мінчук зняў на відэа і свой дыялог з 40-гадовай аператаркай крамы, якая паспрабавала даведацца, што адбылося.
«Жанчына спакойна патлумачыла, што не дае згоды на відэаздымкі і размяшчэнне матэрыялу са сваім удзелам у інтэрнэце. Аднак фігурант для больш маляўнічага кантэнту даносіў да сваёй аўдыторыі, які непрыемны персанал працуе ў маркеце і як яны парушаюць законныя правы грамадзян», — адзначыла следства.
Пасля высвятлення адносін мужчына пакінуў гандлёвае памяшканне і адразу ж апублікаваў відэа на сваіх старонках у сацсетках. Ён не стрымліваўся ў словах, апісваючы свае ўражанні пасля наведвання крамы, акрамя таго, размясціў персанальныя звесткі і фота аператаркі. Пасты даволі хутка сталі папулярнымі і набралі шмат праглядаў.
Пасля гэтага блогер вярнуўся ў тую ж краму, каб зноў зняць супрацоўніцу, якая прынесла яму папулярнасць. Там ён «адкрыта здымаў усё, што адбываецца, на камеру і без усялякага папярэджання пачаў задаваць мінчанцы непрыемныя пытанні».
«На гэтую правакацыю жанчына адказала этычна, як і мінулым разам, сказала назойліваму пакупніку, што не згодная здымацца ў яго роліках. Не атрымаўшы жаданага скандалу на „пацеху публіцы“, фігурант спешна пакінуў маркет», — расказалі ў СК.
Аднак папулярнасць ролікаў прывяла да наступстваў: аператарка крамы сутыкнулася з абразамі ад незнаёмых мінакоў, а яе 11-гадовая дачка зазнала булінг у школе ад сваіх аднагодкаў.
«Падлеткі абражалі маму дзяўчынкі, паказваючы непрыемны пост школьніцы. Такая сітуацыя набыла зусім не забаўляльны характар, і пацярпелая звярнулася па дапамогу да праваахоўнікаў», — паведамілі ў СК.
Следства мяркуе, што блогер «цудоўна ўсведамляў, што ягоныя дзеянні незаконныя, аднак хацеў раскруціць свой канал як мага хутчэй, выкарыстоўваючы розныя спосабы». Ён разумеў, што публіка любіць скандалы, таму вырашыў правакаваць сваімі паводзінамі людзей на канфлікт. «Варта адзначыць, што мінчук раней прыцягваўся да крымінальнай адказнасці за махлярства», — паведамілі ва УСК.
Тэлефон у мужчыны канфіскавалі. Дзеянні мінчука кваліфікавалі па ч. 3 арт. 2031 КК (Незаконныя дзеянні ў дачыненні да інфармацыі пра прыватнае жыццё і персанальныя звесткі, учыненыя ў дачыненні да асобы ў сувязі з ажыццяўленнем ёю службовай дзейнасці). Мужчына пад падпіскай пра нявыезд і належныя паводзіны.
Крымінальная справа ўжо знаходзіцца ў судзе Цэнтральнага раёна, паведамілі ва УСК. Мяркуючы з раскладу судовых паседжанняў, завуць блогера Дзяніс Тамашэвіч — разгляд яго справы прызначаны на 20 жніўня. Раней мужчына быў вядомы як заснавальнік псеўдабрачыннага фонду «Твори добро».