У Бешанковіцкім раёне Віцебскай вобласці ў вадаёме знайшлі 53-гадовую жанчыну. Паводле папярэдняй інфармацыі, яна вярталася дадому ў запрэжаным возе, які пазней перакуліў конь. Пра гэта паведамляе прэс-служба ТРВАД.
Цела жанчыны знайшлі днём 21 лістапада ў сажалцы ў Бешанковіцкім раёне — яно было на глыбіні паўтара метра за тры метры ад берага.
Да гэтага ў міліцыю звярнуўся пляменнік жанчыны з заявай пра знікненне сваячкі. Ён расказаў, што ў аўторак цётка з’ехала дадому на гужавой павозцы ад сваёй сястры з іншай вёскі. Адлегласць, якую ёй трэба было праехаць, — усяго тры кіламетры. Але дома жанчына не з’явілася.
Як мяркуецца, конь перакуліў воз, жанчына звалілася ў ваду і патанула, пасля чаго жывёліна вярнулася ў вёску адна.