«Ён бег і страляў у мінакоў». У Маскве мужчына «ў масцы з аўтаматам у руках» расстраляў чалавека

апублікавана: 6 чэрвеня 2024 в 11.38
абноўлена: 6 чэрвеня 2024 в 13.16
«Зеркало»

На захадзе Масквы (Расія) невядомы ў балаклаве застрэліў 35-гадовага мужчыну і ўцёк. Як паведамляе ТАСС са спасылкай на МУС, гэта было заказное забойства.

Інцыдэнт адбыўся 6 чэрвеня ў раёне Філі-Давыдкава на вуліцы Аляксея Свірыдава. На відэа, якія апублікавалі расійскія тэлеграм-каналы, можна заўважыць, як мужчына спакойна зрабіў некалькі стрэлаў у чалавека, што ляжаў на зямлі, а потым сышоў з месца здарэння.

«Паводле звестак відавочцаў, злачынец пераследаваў сваю ахвяру па дварах», - піша тэлеграм-канал «112».

Паводле папярэдняй інфармацыі, гэта было заказное забойства. Злачынец высочваў канкрэтнага чалавека, выбраў момант і зрабіў некалькі стрэлаў. Ахвяра атрымала раненні ў галаву і цела.

«Кілер схаваўся ў дварах. Абвешчаны план "Перахоп". Па трывозе паднятыя дадатковыя сілы паліцыі», - удакладняе «112».

Як паведамляе тэлеграм-канал Mash, ад стралка цудам выратавалася жанчына з малагадовымі дочкамі. Яна расказала выданню, што ўбачыла «чалавека ў масцы з аўтаматам у руках - ён бег і страляў у мінакоў». Разам з 5-месячнай і 9-гадовай дзяўчынкамі яна пабегла прэч.