Зяленскі назваў самую вялікую памылку ўкраінскай палітыкі за 30 гадоў незалежнасці

2 лiстапада 2022 у 1667397900
«Зеркало»

Уладзімір Зяленскі заявіў, што за 30 гадоў сваёй незалежнасці Украіна не змагла пабудаваць надзейную сістэму бяспекі, таму што недаацаніла пагрозу, якую ўяўляе для яе Расія. Пра гэта прэзідэнт Украіны сказаў у інтэрв'ю чэшскаму тэлебачанню.

Уладзімір Зяленскі адзначыў, што лідары некаторых краін хацелі б, каб ён для заключэння міру пайшоў на кампрамісы з Расіяй, але ён нават не разглядае такія варыянты.

- Я думаю, што некаторыя лідары краін, вядома ж, хацелі б… я не хачу цяпер даваць сваю ацэнку гэтаму, таму што гэта не мае значэння. Для мяне не важна, што хтосьці спрабуе падштурхнуць мяне (да перамоваў). Мы ўжо там былі (у перамовах з РФ). Для нас там няма ніякіх сюрпрызаў, мы ведаем, чым такая гісторыя заканчваецца.

Зяленскі заявіў, што з такім суседам, як Расія, не можа быць гісторыі са шчаслівым канцом.

- Мы павінныя будаваць вельмі прагматычныя адносіны, таму што яна (Расія) вельмі небяспечная. Яна вельмі вялікая. Цяпер мы бачым вынік яе палітыкі.

Украінскі прэзідэнт заявіў, што самай вялікай памылкай украінскай палітыкі з'яўляецца тое, што яны недаацанілі краіну-суседа і за 30 гадоў незалежнасці не змаглі выбудаваць моцную сістэму бяспекі.

- Я думаю таму, што мы не чакалі ад іх (ад Расіі) настолькі агрэсіўных крокаў, настолькі ваяўнічых крокаў, настолькі крывавых учынкаў. Гэта была найбольшая памылка нашай краіны, украінскай палітыкі, - сказаў Зяленскі, адзначыўшы, што ён не хоча паўтарэння гэтых падзей, таму няма сэнсу падштурхоўваць яго да перамоваў з Расіяй.

- Думаю, адной вайны ў гэтым стагоддзі для Украіны дастаткова, - падкрэсліў Зяленскі.

Зяленскі ўпэўнены, што пасля вайны прыярытэтам для многіх краін стане менавіта бяспека.

- Мы разаб'ём Расію на нашай зямлі, але гэта не значыць, што яна не вернецца праз 10−20 гадоў. У любым выпадку, мы мусім забяспечыць сабе бяспеку, - заявіў Зяленскі.