Маштабная ракетная атака на Украіну: выбухі ў Кіеве, Львове, Адэсе і іншых гарадах, сярод пацярпелых — 14-гадовая дзяўчынка

29 снежня 2022 у 1672299000
«Зеркало»

Расія зладзіла масіраваную ракетную атаку на Украіну. Паведамляюць пра выбухі ў Харкаве, Кіеве, Львове. Частку ракет паспяхова збіла ўкраінская СПА.

Раніцай 29 снежня па ўсёй Украіне была абвешчаная паветраная трывога. Кіраўнік Мікалаеўскай вобласці Віталь Кім паведаміў пра пускі ракет з караблёў і самалётаў. Першыя ракеты, паводле яго звестак, паляцелі ў бок горада Сумы.

Прадстаўнік Офіса прэзідэнта Украіны Міхаіл Падаляк заявіў, што па краіне напярэдадні Новага года РФ выпусціла больш за 120 ракет.

Выбухі пацвердзілі ў Харкаве, Адэсе, Кіеве, Львове.

- У Кіеве могуць быць перабоі са святлом. Зарадзіце тэлефоны і іншыя прылады. Зрабіце запас вады, - папярэдзіў гараджан мэр Кіева Віталь Клічко.

Мэр Харкава Ігар Церахаў паведаміў, што папярэдне прылёты зафіксаваныя ў Слабодскім раёне: «Па якіх аб'ектах білі і ці ёсць пацярпелыя - інфармацыя пакуль удакладняецца».

У Кіеве абломкі збітай ракеты пашкодзілі два прыватныя дамы ў Дарніцкім раёне, у Галасееўскім раёне пашкоджанае прамысловае прадпрыемства, у Пячэрскім - дзіцячая пляцоўка, паведаміла Кіеўская гарадская ваенная адміністрацыя.

Пралёт расійскай ракеты над Кіеўшчынай. Відэа апублікаваў кіраўнік Кіеўскай абласной паліцыі Андрэй Небітаў

Неўзабаве Віталь Клічко паведаміў, што ратавальнікі дасталі з пашкоджанага прыватнага дома двух чалавек. Яны шпіталізаваныя. Пошукава-выратавальныя працы працягваюцца.

Таксама на адной з цэнтральных вуліц Кіева абломкі ракеты пашкодзілі аўтамабіль.

У Адэскай вобласці абломкі крылатай ракеты трапілі ў жылы дом, наступствы ўдакладняюцца, напісаў у сваім тэлеграм-канале намеснік кіраўніка Офіса прэзідэнта Кірыл Цімашэнка.

«90% горада - без святла. Чакаем дадатковай інфармацыі ад энергетыкаў. Трамваі і тралейбусы па горадзе не курсуюць. Магчымыя перабоі з водазабяспечаннем. Пераходзім да працы дызель-генератараў на аб'ектах крытычнай інфраструктуры. Заставайцеся ў сховішчах», - напісаў мэр Львова Андрэй Садовы.

Кіраўнік Харкаўскай абласной ваеннай адміністрацыі Алег Сінягубаў паведаміў, што папярэдне пацверджаныя чатыры прылёты: «Імаверна, С-300, у Немышлянскім і Аснавянскім раёнах. Пад прыцэлам - крытычная інфраструктура. На месцы працуюць ратавальнікі. Інфармацыя пра разбурэнні і пацярпелых удакладняецца».

Віталь Кім папярэджвае і пра атаку дронамі - паводле яго, яны ляцяць з поўначы.

Між тым колькасць пацярпелых у Кіеве павялічылася да трох - раненні таксама атрымала 14-гадовая дзяўчынка, яна ў бальніцы.

«Падраздзяленнямі супрацьпаветранай абароны над вобласцю была збітая 21 ракета!!! Абломкі адной з варожых ракет трапілі ў жылы дом, на шчасце, пацярпелых няма. На жаль, з прычыны траплянняў ёсць пашкоджанне энергетычнай інфраструктуры, таму па вобласці адбываюцца экстранныя адключэнні электраэнергіі. Усе службы на месцах і працуюць», - паведаміў кіраўнік Адэскай вобласці Максім Марчанка.

Міністэрства абароны РФ падчас удару па Украіне размясціла ў сваім тэлеграм-канале вось такую карцінку.

Віталь Клічко са спасылкай на СПА паведаміў, што над Кіевам знішчаныя 16 ракет.

Каля адзінаццатай раніцы па Украіне пачалі абвяшчаць адбой паветранай трывогі.