Рэджэп Таіп Эрдаган перамог у другім туры выбараў прэзідэнта Турцыі

28 мая 2023 у 1685304780
«Зеркало»

Дзейны прэзідэнт Турцыі Рэджэп Таіп Эрдаган перамог у другім туры выбараў кіраўніка дзяржавы. Пра гэта паведаміў кіраўнік Найвышэйшай выбарчай рады (ЦВК) краіны Ахмет Енер.

«Колькасць апрацаваных бюлетэняў складае 99,43%. Эрдаган атрымаў 52,14%, а Кемаль Кылычдараглу - 47,86%. Разрыў паміж кандыдатамі складае 2,253 млн галасоў. Яшчэ 809 тысяч галасоў, якія не паступілі ў сістэму падліку, не змогуць паўплываць на вынікі, нават калі ўсе яны адыдуць аднаму з кандыдатаў», - сказаў кіраўнік ЦВК.

У другім туры ўдзельнічалі два кандыдаты. Дзейны прэзідэнт Рэджэп Эрдаган, а таксама кандыдат ад апазіцыі Кемаль Кылычдараглу. У першым туры ніхто з іх не набраў неабходных 50 працэнтаў галасоў, таму жыхароў краіны яшчэ раз запрасілі на ўчасткі.

Галасаванне пачалося, а 8-й раніцы паводле мясцовага часу. Да канца дня 28 траўня, яшчэ да таго, як былі абвешчаныя афіцыйныя вынікі, Рэджэп Эрдаган, які ўжо пачаў прымаць віншаванні з перавыбраннем, назваў гэтыя выбары святам дэмакратыі.

- Мы завяршылі другі тур выбараў прэзідэнта з падтрымкай народа Турцыі. Пераможцам выбараў як 14 траўня, так і 28 траўня, з'яўляюцца ўсе 85 мільёнаў турэцкіх грамадзян. Я дзякую кожнаму грамадзяніну Турцыі за магчымасць знаходзіцца ля стырна ўлады ў Турцыі яшчэ пяць гадоў, - сказаў ён.

На думку яго апанента Кемаля Кылычдараглу, гэтыя выбары - «адзін з самых несправядлівых перыядаў у гісторыі краіны». Таксама ён заявіў, што працягне барацьбу за дэмакратыю ў Турцыі і пасля выбараў.

Прымаць віншаванні ад лідараў некаторых краін Рэджэп Эрдаган стаў яшчэ задоўга да заявы ЦВК. Сярод першых, хто вітаў яго пераабранне, былі эмір Катара, прэм'ер Венгрыі, прэзідэнты Азербайджана, Узбекістана, Сербіі і Расіі.

Павіншаваў яго і Аляксандр Лукашэнка. Нягледзячы на тое, што Рэджэп Эрдаган нязначна апярэдзіў свайго апанента, беларускі палітык назваў яго перамогу «пераканаўчай».

- Лічу вас годным, моцным палітыкам і добрым сябрам Беларусі. У нас аднолькавыя інтарэсы па дээскалацыі міжнароднай абстаноўкі, забяспечанні харчовай бяспекі і мірным вырашэнні спрэчак. Можаце на нас заўсёды разлічваць, - перадае словы палітыка тэлеграм-канал «Пул Первого».

Аляксандр Лукашэнка разлічвае на хуткую сустрэчу з прэзідэнтам Турцыі ў адпаведнасці з дамоўленасцямі, дасягнутымі ў кастрычніку 2022 года ў Астане.

Нагадаем, 14 траўня ў Турцыі прайшлі прэзідэнцкія і парламенцкія выбары. Акрамя Эрдагана і Кылычдараглу ў першым туры ўдзельнічалі яшчэ два чалавекі - кандыдат ад блока малых партый, былы сябра Рэспубліканскай народнай партыі Мухарэм Інджэ і прадстаўнік ад нацыяналістычнага альянсу (АТА) Сінан Аган. За тры дні да пачатку выбараў Інджэ зняў сваю кандыдатуру, абвінаваціўшы апанентаў у парушэнні прынцыпаў сумленнай канкурэнцыі. Аднак яго імя засталося ў бюлетэнях.

У першым туры Рэджэп Эрдаган атрымаў 49,35% галасоў, а Кылычдараглу - 45%.

У канцы траўня стала вядома, што Сінан Аган - трэці ўдзельнік першага тура - падтрымаў Эрдагана і заклікаў сваіх прыхільнікаў аддаць галасы за дзейнага прэзідэнта краіны.