У снежні ў Беларусі павялічаць пенсіі. Рост будзе невялікім — усяго 5%, але Аляксандр Лукашэнка чакае, што пенсіянеры не будуць у сувязі з гэтым крыўдзіцца. Паглядзелі, як змянілася сярэдняя пенсія за пяць гадоў і што на яе можна было купіць у 2017-м і сёння.
Прадуктаў можна купіць больш, чым пяць гадоў таму
За апошнія пяць гадоў сярэдняя пенсія ў Беларусі вырасла больш чым на 80%. У канцы 2017 года сярэдняя прызначаная пенсія па ўзросце была 323,45 рубля. А паводле дадзеных за студзень-лістапад гэтага года, яна склала 596,53 рубля. За гэты час прыкметна павялічыліся і цэны, асабліва на нехарчовыя тавары. Але ў цэлым, як паказвае нашае параўнанне, пакупніцкая здольнасць сярэдняй пенсіі за гэты час вырасла.
У параўнанні з 2017 годам сярэдні пенсіянер можа дазволіць сабе больш гародніны і садавіны (калі зыходзіць з усярэдненых цэн, якія прыводзіць Белстат). Калі пяць гадоў таму за сярэднюю пенсію можна было купіць 83 кілаграмы агуркоў, то сёлета — 152.
Прыкметна больш можна купіць цяпер памідораў, буракоў, морквы, цытрусавых, вінаграду. А вось бульбы за сярэднюю пенсію цяпер выходзіць менш, чым у 2017-м.
Не так моцна заўважная розніца па мясных прадуктах, а па рыбе яна стала горшай. Напрыклад, за сярэднюю пенсію ў кастрычніку гэтага года можна было купіць амаль 50 кілаграмаў фаршу, гэта на пяць кіло больш, чым у тым жа месяцы 2017-га. Цяпер можна купіць на 12 кілаграмаў больш курыцы і на 19 — ялавічыны. А вось замарожанай рыбы цяпер выходзіць крыху менш, чым тады.
За пяць гадоў палепшыліся магчымасці што да куплі малочнай прадукцыі. Напрыклад, калі выдаткаваць усю пенсію на малако, то ў сярэднім выйдзе 337 літраў, пяць гадоў таму — 258 літраў. Цяпер можна купіць на 81 кілаграм мукі больш, чым пяць гадоў таму. А вось грэчкі, рысу і расліннага алею выходзіць менш.
Збіраць на пралку ці машыну давядзецца даўжэй
Каб купіць аўтамабіль (па цане, якую прыводзіць Белстат) у 2017 годзе і з пенсіяй за той жа год, спатрэбілася б адкладаць яе больш за 6,5 года. А па цане 2022-га на аўто трэба адкладаць усю пенсію гэтага года больш за 9 гадоў (пры ўмове, што не мяняецца ні цана аўто, ні памер пенсіі). Бензіну або дызельнага паліва да гэтага аўтамабіля цяпер таксама атрымаецца купіць менш: 247 літраў бензіну супраць амаль 263, 250 і 242 літраў дызельнага адпаведна.
Пяць гадоў таму з сярэдняй пенсіі можна было купіць смартфон, цяпер — не, давядзецца аддаць усю пенсію за месяц і каля траціны за наступны або дадаць больш за 150 рублёў.
У сярэднім адзення пенсіянер можа дазволіць сабе больш, чым у 2017 годзе. Але тады, адкладаючы ўсю пенсію два месяцы, можна было купіць пральную машыну, цяпер жа акрамя пенсіі за два месяцы давядзецца яшчэ дакласці больш за 110 рублёў.
У той жа час за сярэднюю пенсію восенню гэтага года можна было купіць меншую колькасць шампуня, крэму, зубных шчотак і пасты, а таксама дэзадарантаў. А вось акуляраў выходзіць прыкладна такая ж колькасць — 12 пар.
Калі паглядзець суадносіны сярэдняй пенсіі да ўзроўню заробкаў, то яны амаль не змяніліся. Паводле дадзеных за кастрычнік гэтага года, сярэдняя пенсія па ўзросце складала 39% ад сярэдняй зарплаты па краіне (да выліку падаткаў), а ў кастрычніку 2017-га яна была 38,5%. Гэта нягледзячы на заявы ўладаў, якія гучаць апошнія гады, пра неабходнасць падняць памер пенсіі хоць бы да 40% ад сярэдняй зарплаты.
