У Беларусі ў 2023 годзе збіраюцца прыкметна падняць адзіны падатак для індывідуальных прадпрымальнікаў і фізічных асоб, якія працуюць без ІП. Гэты збор плацяць, да прыкладу, рэпетытары, вядоўцы вяселляў, будаўнікі, цырульнікі, касметолагі. У Міністэрстве па падатках і зборах расказалі, чаму павышаюць гэты падатак, а таксама знайшлі ў гэтым пэўны пазітыў.
У МПЗ тлумачаць, што павышэнне ставак адзінага падатку абумоўленае неабходнасцю паступова выраўноўваць падатковую нагрузку з прыбытковасцю па розных відах дзейнасці. Таксама планаваны рост адзінага падатку звязаны з імкненнем выраўняць яго з падаходным зборам з фізічных асоб.
«Напрыклад, пры давядзенні ўзроўню падатковага збору да 16% у Мінску стаўкі адзінага падатку пры раздробным гандлі харчовымі або нехарчовымі таварамі мусілі б вырасці ў 4,3 і 5,4 разу адпаведна замест росту да трох разоў, прадугледжанага праектам (змяненняў у Падатковы кодэкс з 2023 года. — Заўв. рэд.)», — падатковая звяртае ўвагу на ўмоўны пазітыўны момант.
У ведамстве таксама тлумачаць, што ІП могуць пры жаданні перайсці з адзінага падатку на працу з выплатай падаходнага збору. «Выключэннем згодна з праектам з’яўляюцца індывідуальныя прадпрымальнікі, якія ажыццяўляюць дзейнасць па прадстаўленні месцаў для кароткатэрміновага пражывання, для якіх прымяненне адзінага падатку прапануецца зрабіць абавязковым», — дадаюць у МПЗ.
Цяпер падаходны падатак складае 16%, але з 2023 года яго хочуць падняць да 20%.
«Падчас прымянення агульнага парадку падаткаабкладання індывідуальны прадпрымальнік мае права зменшыць свае даходы (выручку) на суму дакументальна пацверджаных выдаткаў, — удакладняюць у МПЗ. — Замест падліку дакументальна пацверджаных выдаткаў індывідуальны прадпрымальнік мае права вызначыць выдаткі па нарматыве ў памеры 20 працэнтаў ад агульнай сумы даходаў (выручкі), якія падлягаюць падаткаабкладанню. Таксама індывідуальныя прадпрымальнікі — платнікі падаходнага падатку, якія не маюць асноўнага месца працы, маюць права зменшыць свае даходы (выручку) на суму стандартных, сацыяльных і маёмасных вылікаў».
Як хочуць змяніць адзіныя падаткі для фізічных асоб, якія працуюць без ІП
Адзіны падатак за распрацоўку вэб-сайтаў, наладку камп’ютараў і ўстаноўку праграмнага забяспечання ў Мінску прапануюць павысіць да 593 рублёў (цяпер збор складае 237 рублёў), у абласных цэнтрах і Мінскім раёне — да 548 рублёў (цяпер — 219 рублёў).
За музычна-забаўляльнае абслугоўванне вяселляў, юбілеяў (да прыкладу, паслугі тамады) хочуць усталяваць адзіны падатак для Мінска ў памеры 518 рублёў (цяпер — 259 рублёў), а для абласных цэнтраў і Мінскага раёна прапануюць падняць да 478 рублёў, (сёння — 239 рублёў).
Адзіны падатак за рэпетытарства ў Мінску могуць падняць да 164 рублёў (цяпер ён складае 82 рублі), у абласных цэнтрах — да 152 рублёў (сёння — 76 рублёў).
Пры гэтым стаўкі за продаж кацянят хочуць пакінуць на ранейшым узроўні: для Мінска — 94 рублі, а для абласных гарадоў і Мінскага раёна — 87 рублёў.