У Лідзе абвясцілі прысуд загадчыцы прадуктовай крамы, якая абвінавачвалася ў перавышэнні ўлады або службовых паўнамоцтваў, паведаміла «Лідская газета».
Як раней расказвалі ў КДК, факты завышэння цэн на прылаўках гандлёвага пункта былі выяўленыя падчас праверкі. Прэтэнзіі ўзніклі да чатырох відаў каўбасных вырабаў: «Смачная», «Балыковая», «Бутэрбродная», «Сервелат французскі».
Суд прызнаў жанчыну вінаватай па ч. 2 арт. 426 (Перавышэнне ўлады або службовых паўнамоцтваў) і прызначыў два гады пазбаўлення волі. Ёй таксама на тры гады забаранілі займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў. У калонію асуджаная не паедзе — да яе ўжылі адтэрміноўку выканання асноўнага пакарання тэрмінам на адзін год.
Нагадаем, раней прысуд за «неабгрунтаванае павышэнне цэн» абвясцілі ў Баранавічах. Намесніку дырэктара крамы па тым жа артыкуле 426 КК прызначылі два гады пазбаўлення волі з адтэрміноўкай. Да гэтага абвясцілі прысуд дырэктару таварыства з дадатковай адказнасцю ў Магілёве. Вердыкт быў аналагічны — два гады пазбаўлення волі з адтэрміноўкай на год.
Як развівалася гісторыя з рэгуляваннем цэн
Нагадаем, 6 кастрычніка на нарадзе па эканамічных пытаннях Аляксандр Лукашэнка заявіў пра забарону на павышэнне любых цэн у краіне. Дарэчы, ужо 10 кастрычніка ён удакладніў, што забарона будзе дзейнічаць некалькі дзён — «да выпрацоўкі сістэмы кантролю за цэнаўтварэннем».
Дзяржкантроль анансаваў маштабныя рэйды па крамах і жорсткую рэакцыю аж да крымінальных справаў. Да праверак падключыліся не толькі прадстаўнікі КДК, але і прафсаюзы і дэпутаты.
Абяцанне наконт крымінальнага пераследу за невыкананне цэнавага дзяржрэгулявання ў ведамстве стрымалі — за завышаныя цэны распачалі дзясяткі крымінальных справаў. Але былі выпадкі, калі справы заводзіліся за заніжэнне цэн: напрыклад, у Брэсцкай вобласці палічылі неабгрунтаванымі зніжкі на прадукцыю мясакамбіната для гандлёвых сетак.
19 кастрычніка ўрад нарэшце прыняў новую пастанову што да рэгуляванні цэн (але апублікавалі яе 20 кастрычніка). Пастановай увялі гранічныя надбаўкі для імпарцёраў і гандлю. Павышэнне адпускных цэн, згодна з пастановай, неабходна ўзгадняць з дзяржаўнымі органамі. Пры гэтым чыноўнікі не маглі адказаць на многія пытанні бізнесу па новаўвядзеннях.
Познім вечарам 26 кастрычніка ўрад паведаміў, што прыняў змены ў нашумелую пастанову № 713. Падрабязнасці не агучваліся. Пры гэтым дакумент уступіў у сілу з 26 кастрычніка, а апублікаваны ён быў бліжэй да абеду 27 кастрычніка на сайце ўрада. Але і ў гэтым выпадку чыноўнікі таксама зацягвалі з тлумачэннямі па новаўвядзеннях.