Аляксандр Лукашэнка запатрабаваў забяспечыць эфектыўную працу БелАЭС, «але не на шкоду якасці будаўніцтва». Пра гэта паведамляе яго прэс-служба.
«Я ведаю, што расіяне часам стогнуць, што мы выстаўляем ім завышаныя патрабаванні па бяспецы. Але яны мусяць разумець: мы чарнобыльская рэспубліка, мы пацярпелі ад выбуху на Чарнобыльскай атамнай станцыі, — растлумачыў ён. — Таму бяспека — пытанне нумар адзін, і мы будзем патрабаваць вельмі жорсткай бяспекі і захавання нормаў падчас будаўніцтва».
Ён пацікавіўся ва ўдзельнікаў нарады, як забяспечваецца бяспека, ці выконваюцца ўсе нормы і прадпісанні ў час будаўніцтва і эксплуатацыі станцыі, а таксама спытаў пра часавыя перспектывы ўводу другога энергаблока Беларускай АЭС у эксплуатацыю, яшчэ раз зрабіўшы акцэнт на якасці будаўніцтва.
«Мы нічога не хавалі і хаваць не збіраемся, што былі пэўныя недахопы ў будаўніцтве атамнай станцыі, якія вельмі аператыўна ўхіляліся нашымі і расійскімі будаўнікамі. Зацягванне тэрмінаў звязанае з тым, што мы сапраўды выстаўляем вельмі высокія патрабаванні да бяспекі. Лепш на паўгода — год пазней, чым дзесьці штосьці недапрацаваць», — сказаў Лукашэнка.
«Якія меры прымаюцца для паскарэння рэалізацыі гэтага праекта? Бо аснова (рэактар, каркас) — гэта ўжо створана, даведзена да розуму. Засталіся паўтара-два працэнты нейкіх недаробак па будаўнічай частцы. Калі мы скончым цалкам і сыдзем з гэтай пляцоўкі? Я абсалютна адкрыты для ўсіх вашых прапановаў. Калі патрабуецца мая дапамога, гатовы адразу ж прыняць неабходныя рашэнні», — дадаў ён.
Нагадаем, падчас будаўніцтва БелАЭС было некалькі скандалаў. Самы гучны інцыдэнт адбыўся ў 2016 годзе, калі 334-тонны корпус рэактара ўпаў з вышыні 3−4 метраў. Толькі праз два тыдні інфармацыю пацвердзілі ў Міністэрстве энергетыкі Беларусі, а ў «Расатаме» заявілі, што на АЭС адбылося не падзенне, а «судакрананне з зямлёй». Тым не менш расіяне пашкоджаны корпус замянілі.