Святлана Ціханоўская заклікала сусветную супольнасць рашуча адрэагаваць на масавыя затрыманні і ператрусы, якія прайшлі ў Беларусі 23 студзеня. Пра гэта лідарка дэмакратычных сіл Беларусі напісала ў Х.
«Я шакаваная сённяшнімі рэйдамі беларускага рэжыму супраць сем’яў палітычных зняволеных. Сярод затрыманых — Марына Адамовіч, жонка палітыка Мікалая Статкевіча, асуджанага на 14 гадоў пазбаўлення волі. Я заклікаю сусветную супольнасць рашуча адрэагаваць на гэтае злачынства», — напісала яна ў X.
Нагадаем, 23 студзеня ў Беларусі сілавікі прыйшлі да некаторых экс-палітвязняў, што засталіся ў Беларусі, а таксама да родных тых, хто асуджаны па «палітычных» артыкулах. Паводле звестак праваабаронцаў на вечар аўторка, як мінімум у 84 чалавек прайшлі такія рэйды.
Адна з крыніц «Люстэрка» расказала, што сярод тых, да каго прыйшлі няпрошаныя госці, былі людзі, якія ўдзельнічалі ў адным з закрытых чатаў, дзе родныя палітвязняў і экс-палітвязні абмяркоўвалі бытавыя пытанні. Паводле крыніцы, асабліва цікавіліся тымі, хто ў чаце пісаў пра дапамогу BYSOL.
У пастановах сілавікоў фігуравалі артыкулы за «фінансаванне» і «ўдзел у экстрэмісцкіх фарміраваннях».
Імаверна, рэйд звязаны з сітуацыяй вакол праекта INeedHelpBY, які дапамагаў прадуктамі пацярпелым ад палітычных рэпрэсій. 16 студзеня КДБ прызнаў ініцыятыву «экстрэмісцкім фарміраваннем».