Мінулы тыдзень прайшоў пад знакам невялікага змянення абменнага курсу беларускага рубля да галоўных замежных валют. Але гандлёвая пяцідзёнка, якая пачынаецца, можа змяніць гэты трэнд. Што чакае валютны рынак на гэтым тыдні, чытайце ў прагнозе Myfin.by.
Разварот курсаў
У пачатку мінулага тыдня курс даляра істотна пайшоў уніз, але пачынаючы з серады і да канца тыдня даляр вярнуўся да росту. Да заканчэння мінулага тыдня абменны курс рубля да даляра ЗША вырас на +0,65%, і закрыццё таргоў пятніцы прайшло з курсам USD/BYN 3,1843. З пачатку гэтага года курс даляра вырас на мінімальныя +0,21%. Аб’ём таргоў на мінулым тыдні быў ніжэйшы за сярэдні гадавы ўзровень.
Дынаміка змены абменнага курсу да расійскага рубля склалася аналагічнай, толькі ў адваротны бок. У пачатку тыдня курс расійскага рубля падымаўся да RUB/BYN 3,5767 за 100 расійскіх рублёў, але да заканчэння тыдня расійскі рубель прасеў да 3,5608, страціўшы за тыдзень -0,20%. З пачатку года захоўваецца рост курсу расійскага рубля на +1,76%. Аб’ём таргоў расійскім рублём на мінулым тыдні быў вышэйшы за сярэдні, максімум 39,152 млн даляраў ЗША ў эквіваленце прыпаў на пятніцу, 26 студзеня.
Першае паседжанне ЕЦБ
Цэнтральнай падзеяй мінулага тыдня на сусветным фінансавым рынку стала першае сёлета, 25 студзеня, паседжанне Еўрапейскага Цэнтрабанка, якое, зрэшты, не стала сенсацыяй. Спадарыня Лагард у выніковай прэс-канферэнцыі чарговым разам панаракала на несуцяшальную дынаміку эканомікі зоны еўра і пераканаўча запэўніла супольнасць, што да лета ніякіх рухаў з працэнтнай стаўкай ЕЦБ чакаць не варта.
Курс асноўнай валютнай пары EUR/USD па выніках паседжання спускаўся да лакальнага мінімуму 1,0816, але закрыццё тыдня прайшло з курсам EUR/USD 1,0854.
Чакаем росту попыту на валюту
На беларускім валютным рынку на гэтым тыдні не выключаны разварот у бок павышэння абменнага курсу рубля. Сёння, 29 студзеня, — заключны дзень падатковых выплат у Расійскай Федэрацыі, але ўжо зразумела, што асноўныя суб’екты расійскага рынку запасліся ліквіднасцю для разлікаў з бюджэтам. Падтрымка рубля заканчваецца.
Пачынаецца новы перыяд і новы месяц. Пасля заканчэння зімовых канікул аб’ём імпарту павялічваецца, што вядзе да павышэння попыту на замежную валюту. І хоць доля даляра ЗША і еўра ў структуры знешнегандлёвых плацяжоў істотна знізіліся, попыт на гэтыя валюты застаецца. Гэта будзе фактарам ціску на расійскі рубель, такім чынам, беларуская валюта таксама можа пайсці ў мінус.
Што падтрымае моцны даляр на гэтым тыдні
Акрамя таго, другая палова тыдня будзе багатая на знешнія фактары, якія таксама могуць аказаць падтрымку даляру ЗША на сусветных пляцоўках. Гэта паседжанне манетарнага камітэта ФРС ЗША ў сераду, 31 студзеня, публікацыя ў чацвер, 1 лютага, статыстыкі па інфляцыі ў зоне еўра і справаздача рынку рабочай сілы NFP у ЗША ў пятніцу, 2 лютага.
Кожная з гэтых падзей паасобку можа падтрымаць «бакс» на пазабіржавым рынку Форэкс, а ўжо адна за адной з высокай доляй імавернасці здольная апусціць пару EUR/USD да ўзроўню ў 1,07 і ніжэй.
На беларускім валютным рынку не выключана, што да заканчэння тыдня пара USD/BYN падымецца вышэй за 3,2, магчымы рост абменнага курсу да 3,23−3,25. Еўра будзе заставацца ў раёне цяперашніх каціровак. Расійскі рубель можа істотна знізіцца да RUB/BYN 3,5 за 100 расійскіх рублёў.