Беларуска паскардзілася старшыня Савета Рэспублікі Наталлі Качанавай, што трапіла ў пенсійную пастку праз указ Аляксандра Лукашэнкі. Гаворка пра дакумент, якім многіх беларусаў пераводзяць на атрыманне пенсій і дапамог на дзяцей праз банкі.
«Мінчанцы яшчэ няма 75 гадоў, і ёй паводле новаўвядзенняў у закон не прыносяць пенсію. З рэлігійных перакананняў пенсіянерка адмаўляецца забіраць пашпарт, ад банкаўскай карткі таксама адмаўляецца. Заяўніца звярнулася з просьбай даць ёй магчымасць атрымліваць грошы без пашпарта па даручэнні», — паведамляе прэс-служба Савета Рэспублікі Нацсходу. Такое пытанне Наталлі Качанавай паступіла 27 сакавіка, калі яна праводзіла прыём насельніцтва ў Мінску. Што адказала чыноўніца і ці паабяцалі беларусцы вырашыць яе пытанне, грамадскасці не паведамілі.
Нагадаем, у снежні 2023 года Аляксандр Лукашэнка падпісаў Закон «Пра змяненне законаў па пытаннях сацыяльнага абслугоўвання і сацыяльных выплат». Гэтым дакументам сярод іншага ўвялі змяненне па выплаце пенсій і дапамог на дзяцей. Адно з асноўных новаўвядзенняў гэтага дакумента — перавод многіх беларусаў на атрыманне пенсій і дапамог на дзяцей праз банкі. Гэта закранае жыхароў Мінска, а таксама гарадоў абласнога падпарадкавання і райцэнтраў. Выбраць фінустанову, праз якую давядзецца атрымліваць гэтыя сродкі, можна самастойна. Раней гэтыя катэгорыі насельніцтва маглі на свой выбар атрымліваць пенсіі і дапамогі на дзяцей праз пошту ці банкі.
Таксама гэтым дакументам Аляксандр Лукашэнка змяніў крытэры, паводле якіх будуць вызначаць, што чалавек можа іх атрымаць. Дамы-інтэрнаты пераймянуюць, а трапіць у іх можа стаць складаней. Гэты дакумент выклікаў абурэнне ў дэпутатаў парламента, якія часта аднагалосна галасуюць за законапраекты.
Дарэчы, гэта не адзіная праблема што да пенсій, з якой 27 сакавіка звярнуліся да Наталлі Качанавай. Так, у жыхаркі Івацэвіцкага раёна было пытанне пра пераразлік памеру пенсіі. Як паведамляецца, для тлумачэння актуальных пытанняў пенсійнага забяспечання на прыём паклікалі першую намесніцу міністра працы Наталлю Паўлючэнка. «У нас праз гэта праблемы, што людзям даюць няправільныя адказы. Трэба праверыць яшчэ раз налічэнне пенсій даяркам гэтых дзвюх вёсак, пра якія казала заяўніца, каб нікога не пакрыўдзіць», — заявіла Наталля Качанава. Іншыя падрабязнасці гэтай гісторыі не паведамляюцца.
Чытайце таксама
