Беларускія дэмсілы дамовіліся з суседзямі пра тое, што абмежаванні на ўезд у ЕС аўтамабіляў з беларускімі нумарамі не закрануць пасажырскага руху, паведаміла кіраўніца Аб’яднанага пераходнага кабінета Святлана Ціханоўская.
Лідарка дэмсіл назвала абмежаванні на ўезд беларускіх аўтамабіляў у ЕС «паспешлівым і шкодным рашэннем»:
— У першую чаргу гэта б’е па людзях, а не па рэжыме Лукашэнкі. Таму вядзецца актыўная праца над тым, каб дабіцца змены гэтага рашэння. Мы кантактуем з Польшчай, Літвой і Латвіяй — і даказваем неабходнасць зрабіць выключэнне для беларусаў, якія заязджаюць у ЕС на сваіх аўто.
Паводле яе, на сёння ёсць дамоўленасць, што абмежаванні не закрануць пасажырскага транспартнага руху. Акрамя таго, беларусы, якія жывуць у Еўрасаюзе, атрымаюць магчымасць перарэгістраваць свае аўтамабілі на еўрапейскія нумары.
— Але мы разумеем: гэтае паслабленне ўсё роўна не вырашыць праблемы мабільнасці беларусаў. Мяжа з ЕС — гэта мяжа са свабодным светам. Яна мусіць быць адкрытая для беларусаў, якія не падтрымліваюць рэжым і бачаць будучыню сваёй краіны ў Еўропе. Мы будзем абараняць інтарэсы беларусаў, — дадала Ціханоўская.
Як расказаў дарадца палітыка Франак Вячорка, цяпер дэмсілы просяць адкласці рэалізацыю рашэння пра абмежаванне на ўезд беларускіх аўто ў Польшчы, Літве і Латвіі.
— Нас запэўнілі, што пасажырскі рух застанецца і забаронаў на ўезд, напрыклад, аўтобусаў не будзе, — паведаміў ён.
Нагадаем, з 16 ліпеня Латвія забараніла ўезд у краіну легкавым аўтамабілям, зарэгістраваным у Беларусі і Расіі. У сваім рашэнні латвійскія чыноўнікі спасылаюцца на «санкцыйны» рэгламент Еўрасаюза.
У МЗС Беларусі гэты крок назвалі «бесчалавечным і антыгуманным», але заявілі, што Мінск не будзе рабіць сіметрычныя захады ў адказ.
Раней Польшча перастала прапускаць на сваю тэрыторыю аўто з беларускімі нумарамі без уласніка за рулём ці ў салоне.
Чытайце таксама
