Польскія і беларускія чыноўнікі вядуць перамовы пра вызваленне палітвязня Андрэя Пачобута. Пра гэта паведамляе Radio ZET, спасылаючыся на крыніцу ў дыпламатычных колах, піша Reform.
Паводле інфармацыі польскай радыёстанцыі, перамовы вядуцца на ўзроўні чыноўнікаў найніжэйшага звяна МЗС і консульскай службы. Сярод аргументаў, якія можа выкарыстоўваць Польшча ў гэтых перамовах, — поўнае закрыццё мяжы з Беларуссю.
Польскія ўлады патрабуюць вызвалення Андрэя Пачобута і іншых палякаў у Беларусі. Акрамя гэтай умовы для нармалізацыі адносін паміж краінамі яны выставілі яшчэ дзве — спыненне дастаўкі мігрантаў да польскай мяжы з Беларусі, а таксама супрацоўніцтва ў расследаванні справы пра забойства мігрантам польскага вайскоўца.
Выданне адзначае, што ў выпадку выканання гэтых умоваў беларускім бокам можна будзе гаварыць пра адкрыццё дадатковых пунктаў пропуску на мяжы. Калі ж нічога не зменіцца, то Польшча збіраецца закрыць усе памежныя пераходы на мяжы з Беларуссю. На думку польскіх чыноўнікаў, гэтае рашэнне негатыўна адаб’ецца на пастаўках тавараў, імпартаваных з Кітая.
Нагадаем, што Андрэй Пачобут, журналіст і актывіст польскай меншасці, быў асуджаны ўладамі Беларусі летась на восем гадоў пазбаўлення волі ў калоніі ўзмоцненага рэжыму. Яго судзілі па артыкулах пра заклікі да санкцый і распальванне варожасці.