Беларусь не збіраецца захопліваць размешчаную ва Украіне Чарнобыльскую атамную электрастанцыю. Пра гэта раптоўна заявіў Аляксандр Лукашэнка 1 кастрычніка на сустрэчы з генеральным дырэктарам Міжнароднага агенцтва па атамнай энергіі (МАГАТЭ) Рафаэлем Гросі, перадае БЕЛТА.
Беларускі палітык запэўніў госця, што зробіць усё для таго, каб «забяспечыць рэгіянальную ядзерную бяспеку».
— У гэтым вы можаце не сумнявацца. Мы разумныя людзі і на рознага роду авантуры не кідаемся, — заявіў Лукашэнка.
Палітык растлумачыў, што тэму рэгіянальнай бяспекі ён падняў «не проста так»: нібыта «апошнім часам ва Украіне гучаць заявы пра тое, што Лукашэнка хоча захапіць Чарнобыльскую станцыю».
— Я толькі дагэтуль не магу зразумець: што ў аснове гэтага ляжыць, навошта Лукашэнку Чарнобыльская станцыя? Мы і так нацярпеліся ад таго, што адбылося пасля выбуху гэтай атамнай станцыі, якую — заўважце — мы не будавалі, мы не абслугоўвалі і мы не падрывалі. А асноўная бяда легла на чвэрць нашай тэрыторыі. І мы дагэтуль змагаемся з наступствамі Чарнобыльскай катастрофы. Таму я вас абсалютна запэўніваю, што гэта глупства поўнае, якое мяне нават здзівіла. Мы ў страшным сне не маглі ўявіць, што нам давядзецца «захапіць» Чарнобыльскую станцыю і за яе потым адказваць. Няма такой неабходнасці з боку Беларусі. І, паверце мне, з боку Расіі гэтак жа — не было, няма і ніколі не будзе, — падкрэсліў Аляксандр Лукашэнка.
Нагадаем, у лютым 2022 года Расія праз зону адчужэння з Беларусі ўварвалася ва Украіну і захапіла Чарнобыльскую АЭС. Станцыя заставалася пад расійскай акупацыяй да 31 сакавіка 2022 года. Дагэтуль пад расійскім кантролем знаходзіцца Запарожская АЭС, размешчаная на беразе Кахоўскага вадасховішча ў акупаванай частцы Запарожскай вобласці Украіны.