У Гродзенскай вобласці да канца 2025 года знялі абмежаванні на вываз тавараў у Літву і Польшчу. Гэта прадугледжваецца рашэннем Гродзенскага аблвыканкама. Яно датычыць фізічных асоб, што выязджаюць у гэтыя краіны. Нагадаем, раней у некаторых абласцях (у тым ліку ў Гродзенскай) вярнулі мясцовы збор за перасячэнне на аўто дзяржмяжы — ён складае адну базавую, або 42 рублі. Гэтая аплата датычыць выезду ў краіны ЕС, у Расію — не.
Абмежаванні на вываз за мяжу некаторых тавараў увялі ў 2022 годзе. Гэта датычыць у тым ліку крупаў, пшанічнай мукі, макароны, расліннага алею, цукру, солі і кансерваў. Да прыкладу, для пшанічнай мукі вызначылі ліміт у адзін кілаграм, для кансерваў — не больш за тры слоікі, для іншых прадуктаў — адзін кілаграм ці адзін літр.
Аднак пазней вобласці, што мяжуюць з краінамі ЕС, часова здымалі абмежаванні на вываз тавараў для асабістага карыстання.
Раней беларускія дзяржСМІ і Аляксандр Лукашэнка час ад часу сцвярджалі, што літоўцы скупляюць нашыя тавары. Даходзіла да заяваў, што жыхары гэтай суседняй краіны (разам з латышамі і палякамі) «стаяць уздоўж мяжы і просяць солі». Пацверджання гэтым словам не прыводзіліся.
Чытайце таксама
