Чыноўнікам трэба «абавязкова звярнуць увагу на адток людзей з рэгіёнаў», заявіў Аляксандр Лукашэнка 3 сакавіка на нарадзе па фармаванні эканамічнага блока ўрада.
«Нам трэба абавязкова звярнуць увагу на адток людзей з рэгіёнаў. Ні ў якім разе нельга дапускаць гэтага адтоку. Дыферэнцыяцыя ў заработнай плаце мусіць быць скарочаная. Людзі павінныя атрымліваць заработную плату ў рэгіёнах прыкладна такую ж, як у Мінску», — сказаў Аляксандр Лукашэнка.
Гаворачы пра задачы, якія стаяць перад эканамічным блокам урада, Аляксандр Лукашэнка падкрэсліў неабходнасць прыцягнуць інвестыцыі. Ён нагадаў пра ініцыятыву «Адзін раён — адзін праект». «Я гатовы да таго, каб на падставе гэтай ініцыятывы мы бачылі новыя ідэі. Але інвестыцыі павінныя нарастаць. І мы плануем, што за пяцігодку мы атрымаем рост інвестыцый прыкладна на траціну», — адзначыў палітык.
Асаблівую ўвагу, паводле Аляксандра Лукашэнкі, неабходна аддаваць рэалізацыі знакавых інвестыцыйных праектаў, у ліку якіх індустрыяльны парк «Вялікі камень», Беларуская нацыянальная біятэхналагічная карпарацыя, вытворчасць легкавых аўтамабіляў BELGEE. «Я спадзяюся, што з’явяцца і новыя», — дадаў Аляксандр Лукашэнка.
Як чыноўнікі ўжо ўздымалі праблему адтоку людзей з рэгіёнаў
Нагадаем, улады ў лістападзе 2024 года ўжо ўздымалі пытанне, як вярнуць людзей у рэгіёны і спыніць адтуль адток насельніцтва. Тады кіраўнік Адміністрацыі Лукашэнкі Дзмітрый Крутой на паседжанні прэзідыума Усебеларускага народнага сходу заявіў, што кожны год з сярэдняга раёна на восем-дзесяць тысяч занятых у эканоміцы з’язджае 300−400 чалавек. Атрымліваецца, што кожны год такі раён страчвае да 4−5% работнікаў. Больш за тое, нярэдка людзі з’язджаюць сем’ямі, а значыць, адток насельніцтва будзе яшчэ вышэйшы.
Урад лічыць, што справіцца з гэтай праблемай (і ўтрымліваць работнікаў у рэгіёнах) дапамогуць метады, якія выкарыстоўваліся ў СССР і захаваліся ў незалежнай Беларусі.
— Першае — гэта тэрміновае аднаўленне працы райаграсэрвісаў, будаўнічых перасоўных мехкалонаў, сельгасхіміі, арганізацый, якія адказваюць за абслугоўванне даільных установак, бурэнне свідравін вады, забяспечанне палівам. Другое — неабходнасць пераўтварэнняў у АПК (аграпрамысловыя комплексы. — Заўв. рэд.). Кропкавае, эканамічна абгрунтаванае і фінансава выверанае аб’яднанне гаспадарак у прывязцы да лідараў, маякоў раёна, аднаўленне ці пашырэнне практыкі выкарыстання мехатрадаў, перамяшчэнне жывёлы на новыя малочнатаварныя комплексы, паскораная меліярацыя, праца са старымі дамамі, уцягванне земляў у сельгасабарот, — заяўляў Дзмітрый Крутой.
На яго думку, трэба таксама актыўней прадаваць пустыя дамы, якія знаходзяцца ў спецыяльным рэестры.