«Люстэрка» ўжо пісала пра трох ахоўнікаў Лукашэнкі, якія часцей за ўсё трапляюць на фота з ім. Мы працягваем расказваць пра целаахоўнікаў палітыка. Сёння гаворка пойдзе пра трох супрацоўнікаў Службы бяспекі. Двое з іх суправаджалі Лукашэнку, калі той выйшаў з аўтаматам да ачаплення ля Палаца Незалежнасці. А яшчэ адзін — у паездках палітыка па краіне. Вось што пра іх вядома.
Ад кіроўцы аўтобуса да целаахоўніка Лукашэнкі
Калі 23 жніўня 2020 года Аляксандр Лукашэнка з аўтаматам у руках выйшаў да ачаплення сілавікоў, яго суправаджалі трое ахоўнікаў. Пра аднаго з іх, 48-гадовага Аляксея Ляшкевіча, мы ўжо пісалі. Ён дагэтуль ахоўвае Лукашэнку амаль ва ўсіх паездках. Яшчэ гуляе ў хакей — у камандзе «Бастыён-2» мінскай аматарскай лігі разам з Віктарам Лукашэнкам.
З дапамогай BYPOL «Люстэрку» ўдалося высветліць асобы астатніх целаахоўнікаў. Першы — гэта 38-гадовы Уладзімір Падалінскі. На відэа відаць, як ён зрывае бел-чырвона-белы сцяжок з кветкавай клумбы.
Паводле інфармацыі BYPOL, у Службе бяспекі ён служыў прынамсі з 2012 года, а да гэтага нейкі час працаваў кіроўцам аўтобуса ў Мінску.
Падалінскага можна часта сустрэць побач з Лукашэнкам на здымках другой паловы 2020 года. Напрыклад, ён суправаджаў палітыка падчас візіту на МЗКЦ 17 жніўня ці МАПІД 18 верасня.
Апошні раз Падалінскі трапіў на здымкі прэс-службы палітыка ў пачатку студзеня 2021 года. Тады Лукашэнка разам з мітрапалітам Веніямінам наведваў храм Узвышэння Святога Крыжа ў Мінску.
Пра новае месца працы былога целаахоўніка палітыка ўдалося даведацца дзякуючы расследаванню BELPOL пра кампанію «ГардСэрвіс». Падалінскі займае ў ёй пасаду «інспектара ваенізаванай аховы спецыяльнага аддзела аховы фізічных асоб» (спіс супрацоўнікаў арганізацыі ёсць у распараджэнні рэдакцыі).
У «ГардСэрвісе» былы целаахоўнік Лукашэнкі атрымлівае 2325 рублёў за месяц (паводле звестак на ліпень 2023 года).
Галоўныя кліенты, якіх ахоўваюць супрацоўнікі «ГардСэрвісу», — Віктар Шэйман і Аляксей Алексін. У расследаванні BELPOL сцвярджалася, што ў перыяд з лістапада 2021 года да верасня 2023 Шэйман заплаціў кампаніі за ўласную ахову больш за адзін мільён рублёў.
Больш за 20 гадоў стажу і замежныя камандзіроўкі
Другога целаахоўніка, які суправаджаў Лукашэнку каля ачаплення ля Палаца Незалежнасці, завуць Сяргей Жукоўскі. Вядома пра яго няшмат. Ахоўніку 47 гадоў. Паводле звестак BYPOL, у Службе бяспекі Лукашэнкі ён служыць прынамсі з 2003 года.
Сяргей Жукоўскі дагэтуль працуе ў Службе бяспекі і часта суправаджае Лукашэнку ў паездках па Беларусі і іншых краінах. Сёлета ён трапіў на фатаграфіі падчас візітаў палітыка ў Гомель, Аршанскі раён і ААЭ.
Як расказалі «Люстэрку» ў BYPOL, жонка ахоўніка Вольга Жукоўская ў 2020 годзе працавала бухгалтаркай у «Беларускай нафтавай кампаніі» (знаходзіцца пад санкцыямі Вялікабрытаніі і Польшчы). Профіль жонкі ахоўніка ў сацсетцы «ВКонтакте» перастаў абнаўляцца ў пачатку верасня 2020 года.
Ахоўнік Лукашэнкі, які жанаты на супрацоўніцы амерыканскай кампаніі
Яшчэ адзін ахоўнік, які часта суправаджае Лукашэнку з 2020 года, — 38-гадовы Павел Лагун.
Ён быў побач з палітыкам 30 снежня 2020 года, калі той наведваў вайсковую частку мінскага АМАПа і дзякаваў сілавікам «за мужнасць, стойкасць, вернасць прысязе і свайму народу».
Яго можна заўважыць на здымках прэс-службы Лукашэнкі ў 2021 і 2022 гадах. Сёлета Лагун забяспечваў ахову падчас рабочай паездкі ў Камянецкі раён у жніўні.
У базе дадзеных «Кіберпартызан» няма інфармацыі пра тое, колькі гадоў Лагун працуе ў Службе бяспекі.
Яго жонка — Наталля Лагун — (мяркуючы з яе LinkedIn) амаль 5 гадоў узначальвала HR-аддзел у IT-кампаніі Oxagile (галаўны офіс знаходзіцца ў США).
Улетку 2023 года тэхнічны дырэктар Oxagile угаворваў супрацоўнікаў наведаць КДБ і «кампенсаваць» данаты, якія яны рабілі ў фонды ў 2020 годзе.
— Я быў здзіўлены, што наогул не адчуў прэсінгу, стаўлення як да г**на, — расказваў тады дырэктар. — Гутарка заняла тры гадзіны. Ён <супрацоўнік КДБ> нібы праводзіў палітінфармацыю, расказваў, што, чаму, як, навошта гэта робіцца. Галоўны мэсэдж у тым, што кіраўніцтва краіны ні разу не хоча, каб айцішнікі збеглі за мяжу. ІТ — гэта важны складнік эканомікі, важна, каб падаткі прыходзілі, справа рабілася, людзі жылі, павышалі свой дабрабыт і, адпаведна, дабрабыт гэтай краіны. Але пры гэтым выявілася, што айцішнікі зрабілі нібы не па законе ў 2020 годзе. Данаты лічацца парушэннем закона, а вядома, што 70% іх рабілі айцішнікі.
З кастрычніка 2023 года Наталля Лагун працуе рэкруцёркай у IT-кампаніі SoftTeco (у кампаніі ёсць офісы ў ЗША, Польшчы, Літве, Украіне).
Мяркуючы з фота ў Instagram жонкі целаахоўніка Лукашэнкі, пара даволі рэлігійная: год таму муж і жонка абвянчаліся ў Свята-Успенскім Жыровіцкім манастыры. Сям’я любіць займацца спортам і адпачываць у Турцыі.
Што вядома пра Службу бяспекі
Гэта адна з самых сакрэтных і непублічных сілавых структур у краіне. Аляксандр Лукашэнка стварыў яе ў 1994 годзе на базе спецпадраздзялення КДБ «Альфа» і Галоўнага ўпраўлення дзяржаховы МУС. Акрамя бяспекі самога Лукашэнкі ведамства займаецца яшчэ і аховай кіраўнікоў замежных дзяржаваў і ўрадаў падчас іх візітаў у Беларусь. З 2017 года Службу бяспекі ўзначальвае Дзмітрый Шахраеў.
Інфармацыі, колькі чалавек працуе ў Службе бяспекі, няма. У 2022 годзе «Кіберпартызаны» ўзламалі дзяржаўныя базы дадзеных і выклалі ў сеціва інфармацыю пра 1083 ахоўнікаў Лукашэнкі. Цяпер на сайце blackmap.org (праект «Кіберпартызан» і палка Каліноўскага) можна знайсці звесткі пра 1147 супрацоўнікаў Службы бяспекі. Частка з іх ужо выйшла на пенсію або змяніла месца працы.
Пры гэтым за апошнія некалькі гадоў выдаткі на ахову Лукашэнкі толькі раслі. Так, калі ў 2021 годзе на Службу бяспекі ў рэспубліканскі бюджэт заклалі 29,7 мільёна, то ў 2022-м гэтая сума вырасла да 33,6 мільёна, а на 2023-і яе павялічылі да рэкордных 50,7 мільёна рублёў.
Часцяком менавіта начальнікаў Службы бяспекі Лукашэнка потым прызначае на ключавыя пасады ў краіне — міністрамі, памочнікамі, кіраўнікамі яго адміністрацыі і гэтак далей.
Чытайце таксама
