Колькасць ахвяр нападу ХАМАС на Ізраіль па стане на 9 кастрычніка вырасла да 800, больш чым 2500 чалавек атрымалі раненні, дзясяткі людзей у крытычным стане, паведамляе The Times of Israel.
Колькасць загінулых у выніку нападу ХАМАСа і наступных баёў узрасла да 800 чалавек.
Міністэрства аховы здароўя Ізраіля паведамляе, што па стане на 9 кастрычніка ў бальніцы даставілі 2506 параненых, з якіх 23 — у крытычным стане, а 353 атрымалі сур’ёзныя раненні.
Як пачыналася новая вайна
Нагадаем, 7 кастрычніка баевікі ХАМАС пачалі аперацыю «Бура Аль-Аксы» — выпусцілі па Ізраілі некалькі тысяч ракет і прарваліся на тэрыторыю краіны. ХАМАС абвінавачвае ізраільскі бок у акупацыі і «апаганьванні святога месца мусульман», а таксама ў неаднаразовых уварваннях у мячэць Аль-Акса на Храмавай гары ў Ерусаліме.
Лідар вайсковага крыла руху ХАМАС Мухамед Дэф заявіў, што па віне Ізраіля загінулі і атрымалі раненні сотні палестынцаў, таксама сотні з іх знаходзяцца ў ізраільскіх турмах. Ізраіль таксама адмовіўся ад перамоваў наконт іх абмену.
Ізраільскі ўрад фактычна абвясціў пра стан вайны — задзейнічаў параграф «40-Алеф» (40-א). Такім чынам, армія атрымала поўную свабоду дзеянняў. Мінулым разам гэты параграф уводзілі ў дзеянне 50 гадоў таму, падчас «вайны Суднага дня». За 48 гадзін ЦАХАЛ мабілізаваў 300 тысяч рэзервістаў.
Раніцай 9 кастрычніка Армія абароны Ізраіля заявіла пра аднаўленне кантролю над усімі населенымі пунктамі на мяжы з сектарам Газа.
Паводле звестак Арміі абароны Ізраіля, з раніцы суботы загінулі больш за 700 ізраільцян, 2150 чалавек атрымалі раненні. Палестынскія ўлады паведамляюць, што ў сектары Газа ў выніку удараў у адказ загінулі 413 чалавек і 2300 атрымалі раненні. Сярод пацярпелых ёсць і двое грамадзян Беларусі.
Чытайце таксама
