Прэм’ер Венгрыі ў інтэрв'ю Le Point расказаў, на якіх умовах гатовы ўзгадніць фінансавую дапамогу ЕС Кіеву і каго з палітычных лідараў лічыць здольным спыніць вайну ва Украіне.
У прыватнасці, Орбан назваў Трампа «самым паспяховым на міжнароднай арэне прэзідэнтам ЗША».
«Ён не пачаў ніводнай вайны. Пагадненні Аўраама (пра нармалізацыю адносін паміж Ізраілем і арабскімі дзяржавамі. — Заўв. рэд.) былі адзіным сур’ёзным шанцам прынесці мір, баланс і прымальны лад жыцця ў вельмі складаны блізкаўсходні рэгіён», — сказаў венгерскі прэм’ер.
Ён дадаў, што перакананы: калі б у лютым 2022 года прэзідэнтам ЗША быў Дональд Трамп, то «вайны ў Еўропе больш не было б».
«Сёння я не бачу іншага лідара ў Еўропе ці Амерыцы, які быў бы дастаткова моцным, каб спыніць вайну. У міру ёсць імя — Дональд Трамп», — сказаў Орбан.
Венгерскі прэм’ер таксама назваў умову, пры якой Будапешт здыме вета на вылучэнне Кіеву фінансавай дапамогі ЕС у памеры 50 млрд еўра (раней Венгрыя стала адзіным чальцом ЕС, што выказаўся супраць вылучэння гэтых грошай Украіне. — Заўв. рэд.).
«Мы вырашылі зрабіць кампрамісную прапанову: мы не згодныя на змяненне бюджэту. Мы не згодныя з тым, што мусім вылучыць 50 млрд еўра, гэта велізарная сума. Мы не згодныя з тым, што мусім даць яе на чатыры гады. Але Венгрыя гатовая далучыцца да ініцыятывы 26 краін Еўрасаюза, калі будуць гарантыі таго, што кожны год мы будзем вырашаць, працягваць ці не адпраўляць гэтыя грошы. І гэта штогадовае рашэнне павіннае мець тую ж юрыдычную аснову, што і сёння: яно павіннае быць аднагалосным», — заявіў ён.
Венгерскі прэм’ер таксама выказаў шкадаванне наконт таго, што некаторыя краіны інтэрпрэтуюць пазіцыю Будапешта як спосаб шантажу. Аднак, паводле яго, у гэтым выпадку гаворка ідзе «пра аднаўленне і падтрыманне адзінства Еўрасаюза».