У польскім горадзе Оструве-Велькапольскім знялі з цягніка п’янага беларуса, які ехаў разам з маленькай дачкой і паводзіў сябе агрэсіўна. Для гэтага давялося нават затрымаць цягнік, паведамілі ў Галоўным упраўленні аховы чыгунак Польшчы. На інфармацыю звярнуў увагу MOST.
Інцыдэнт здарыўся ў мінулую суботу. Начальнік цягніка, які рухаўся па маршруце Згажэлец — Варшава, выклікаў чыгуначную ахову з просьбай утаймаваць аднаго з пасажыраў — гэта быў 41-гадовы беларус, які ехаў разам з паўтарагадовай дачкой. Ён быў п’яны і да таго ж агрэсіўна настроены.
Добраахвотна пакідаць цягнік мужчына адмовіўся. Яго давялося выводзіць сілай, для гэтага цягнік затрымалі на 17 хвілін. На месца здарэння выклікалі паліцэйскіх — ім і перадалі беларуса і ягоную дачку.
Тэст паказаў, што ў выдыханым паветры больш за 1 праміле алкаголю. Пакуль адны праваахоўнікі разбіраліся з мужчынам, іншыя глядзелі дзяўчынку.
Цяпер беларуса прыцягнуць да адказнасці за тое, што ён падвергнуў жыццё і здароўе дзіцяці небяспецы, а таксама стаў вінаватым у затрымцы цягніка.