Беларуская мытня знайшла ў пасылцы рухавік для ўдарнага верталёта Мі-24. Дастаўку пасылкі на адрас грамадзяніна Беларусі ажыццявіла расійская кур’ерская служба, паведамляе ДМК Беларусі.
У пасылцы мытнікі знайшлі авіяцыйны турбавальны рухавік, прызначаны для ўдарнага верталёта Мі-24.
«Да дзейнасці, звязанай з незаконным перамяшчэннем прадукцыі вайсковага прызначэння, датычны атрымальнік пасылкі, 57-гадовы грамадзянін Беларусі, які меў намер вывезці рухавік за межы ЕАЭС», — гаворыцца ў паведамленні.
Па гэтым факце распачалі крымінальную справу па ч. 1 арт. 333−1 (Незаконнае перамяшчэнне праз мытную мяжу Еўразійскага эканамічнага саюза або дзяржаўную мяжу Рэспублікі Беларусь моцнадзейных, атрутных рэчываў, радыеактыўных матэрыялаў, агнястрэльнай зброі, боепрыпасаў, выбуховых рэчываў, выбуховых прылад, зброі масавага паражэння або сродкаў яе дастаўкі, а таксама іншых відаў узбраення і ваеннай тэхнікі) КК Беларусі. Санкцыя артыкула прадугледжвае пакаранне ў выглядзе пазбаўлення волі на тэрмін да сямі гадоў.