Паводле звестак уладаў, падчас пажару ў 12-павярховым гатэлі на горным курорце ў Турцыі загінулі 76 чалавек, яшчэ 51 атрымаў раненні. Трагедыя адбылася ў разгар сезона, калі гатэль быў запоўнены на 80−90%, перадае The Guardian.
Пажар пачаўся каля 03.30 раніцы ў рэстараннай зоне гатэля. Агонь хутка распаўсюдзіўся па драўляных канструкцыях будынка, а густы дым запоўніў калідоры. Спрабуючы выратавацца, госці гатэля скакалі з вокнаў ці спрабавалі спусціцца з дапамогай звязаных прасцін.
«Гэта было як апакаліпсіс. Полымя ахапіла гатэль літаральна за паўгадзіны», — расказаў агенцтву Reuters відавочца падзей Меўлют Азер.
Іншы сведка, Амер Сакрак, супрацоўнік суседняга гатэля, паведаміў, што людзі спрабавалі выратавацца самастойна, не чакаючы дапамогі.
«Людзі пачалі скакаць у паніцы. Адзін з іх скокнуў з 11-га паверха… Хай Бог будзе да яго міласэрны», — апісвае ён падзеі.
Паводле яго словаў, іншыя спрабавалі спусціцца з дапамогай звязаных прасцін — адна з такіх звязак абарвалася, мужчына загінуў.
«Адзін бацька крычаў пра сваё аднагадовае дзіця: „Я выкіну сваё дзіця, ці яно згарыць“», — дадаў ён.
Некаторыя пацярпелыя паведамілі, што пажарная сігналізацыя не спрацавала.
«Мая жонка адчула пах гару. Сігналізацыі не было. Мы паспрабавалі падняцца наверх, але не змаглі: усюды быў агонь. Мы выбраліся праз дым і выбеглі вонкі», — расказаў журналістам госць гатэля Атакан Елькаван.
Прэзідэнт Турцыі Рэджэп Таіп Эрдаган абвясціў нацыянальную жалобу па загінулых. Міністр унутраных справаў Алі Ерлікая, які прыбыў на месца трагедыі, падкрэсліў, што ніхто з вінаватых не ўнікне правасуддзя. Ён таксама паведаміў, што з 76 загінулых ужо апазнаныя 45 чалавек. 17 пацярпелых выпісаныя з бальніцы, але адзін у крытычным стане.
У рамках расследавання былі затрыманыя дзевяць чалавек, уключаючы ўладальніка гатэля. Урад прызначыў шэсць пракурораў для вывучэння прычын пажару. «Усе дакументы пра пажарную бяспеку гатэля будуць правераныя, уключаючы справаздачу з праверкі, праведзенай летась», — паведаміў міністр юстыцыі Йылмаз Тунч.
Курорт Карталкая, размешчаны ў гарах Кероўлу прыкладна за 300 км ад Стамбула, карыстаецца папулярнасцю сярод турыстаў, асабліва ў святочныя перыяды. У момант трагедыі ў гатэлі знаходзілася 238 гасцей. Эвакуяваных часова размясцілі ў іншых гатэлях рэгіёна.
Нагадаем, у аўторак, 21 студзеня, пажар ахапіў 12-павярховы гатэль Grand Kartal на гарналыжным курорце Карталкая ў правінцыі Балу на паўночным захадзе Турцыі. Раней паведамлялася пра 66 загінулых.