Карціну «Купала» пра жыццё аднаго з галоўных беларускіх класікаў, паэта Янкі Купалы, цяпер можа паглядзець любы ахвочы ў тым выглядзе, у якім яна мусіла паказвацца ў кінатэатрах. Фінальную версію фільма размясцілі ў інтэрнэце, паведаміла «Радыё Свабода». У Беларусі яго ніколі не паказвалі. Фільм фактычна трапіў пад цэнзуру спачатку на фоне пратэстаў супраць інтэграцыі з Расіяй у 2019 годзе, а потым і на фоне падзей 2020 года.
Стужку здымаў рэжысёр Уладзімір Янкоўскі на «Беларусьфільме» на замову Міністэрства культуры за кошт бюджэту. Яна анансавалася дзяржСМІ як галоўны нацыянальны кінапраект.
Прэм’ера чакалася яшчэ ў канцы 2019 года, але была адкладзеная: як казаў рэжысёр, спачатку фільм мусіў паглядзець Лукашэнка. Таксама стваральнікі вырашылі спачатку правезці фільм па міжнародных кінафестывалях, а ўжо потым прадставіць у Беларусі, а таксама выпусціць 4-серыйную версію для тэлебачання.
У 2020 годзе абмяркоўвалася, што фільм могуць прадставіць у лістападзе на фестывалі «Лістапад» у Мінску, аднак потым яго знялі з паказу, а потым наогул адмянілі фестываль. У выніку прэм’ера карціны адбылася 14 лістапада 2020-га на расійскім кінафестывалі «Маскоўская прэм’ера». Паказ быў для абмежаванай колькасці гледачоў з прычыны каранавіруса — паглядзелі фільм толькі 170 чалавек, ацэнкі крытыкаў былі высокімі, стужка атрымала прыз «Падзея года».
Аднак у Беларусі «Купалу «так і не паказалі, у дадатак «Беларусьфільм «адклікаў яго з замежных фестываляў. Карціну паклалі на паліцу.
На фоне скандалаў з затрымкай выхаду фільма і пратэстаў у верасні 2020 года хтосьці выклаў у інтэрнэт чарнавую версію фільма: у ёй адрозніваўся мантаж, не хапала колеракарэкцыі і некаторых спецэфектаў, гук таксама быў чарнавым. Дагэтуль гэта была адзіная версія фільма, даступная для прагляду. Яна ўсё яшчэ даступная на YouTube.
Аднак цяпер апублікаваная менавіта фінальная версія карціны — прынамсі, так сцвярджаюць тыя, хто яе размясціў.
Як адзначае тэлеграм-канал «Священный Белавуд», на відэа прысутнічае вадзяны знак «Беларусьфільма»: гэта сведчыць пра тое, што гэтая копія рассылалася адборшчыкам фестываляў і патэнцыйным пакупнікам правоў на паказ.
Нагадаем, фільм здымалі ў Мінскай вобласці. Ролю Янкі Купалы ў ім выканаў латвійскі акцёр Мікалай Шастак, таксама ў карціне зняліся многія беларускія акторы.