Беларускі літаратуразнаўца, гісторык і грамадскі дзеяч Аляксей Каўка памёр сёння, 21 сакавіка, у Маскве. Яму было 86 гадоў. Пра гэта сябры Каўкі паведамілі ў сацыяльных сетках.
Каўка нарадзіўся ў 1937 годзе ў Чэрвенскім раёне. Пачынаў сваю кар’еру ў камсамоле (першым сакратаром Чэрвенскага райкама), з 1965 года жыў у Маскве. Працаваў у Акадэміі навук СССР, у 1979−1982 гадах — у Польшчы, дзе сярод іншага быў дарадцам амбасады СССР у гэтай краіне. Карыстаючыся дыпламатычным пашпартам, ён перапраўляў на Захад творы, якія не маглі быць апублікаваныя ў Беларусі праз цэнзуру.
У другой палове 1970-х напісаў «Письмо русскому другу», прысвечанае становішчу беларускай мовы ў СССР. У ім палітыка камуністычных уладаў у нашай краіне называлася асіміляцыйнай. Рукапіс распаўсюджваўся ў самвыдаце. Калі б аўтарства тэксту стала вядомае, кар’ера Каўкі адразу б завяршылася.
У 1991-м пасля трагічных падзей у Вільнюсе, калі савецкія спецслужбы штурмавалі тэлевежу і загінулі людзі, выйшаў з КПСС.
Каўка абараніў доктарскую дысертацыю па філалогіі, даследаваў беларускую гісторыю і культуру.
Чытайце таксама
