Баранавіцкую птушкафабрыку «Дружба», папярэдняга дырэктара якой яшчэ летам знялі з пасады за падазрэнні ў карупцыі, узначаліў былы старшыня Пінскага гарвыканкама Андрэй Мулярчык. Новага кіраўніка калектыву прадставіў старшыня Брэсцкага аблвыканкама Юрый Шулейка, піша «Наш край».
— Андрэй Уладзіміравіч зарэкамендаваў сябе ўмелым арганізатарам, ён — кіраўнік з досведам, — заявіў кіраўнік аблвыканкама.
Мулярчык нарадзіўся ў 1976 годзе ў Драгічыне. Скончыў Беларускі дзяржаўны эканамічны ўніверсітэт па спецыяльнасці «Бухгалтарскі ўлік, аналіз і аўдыт» і Акадэмію кіравання пры прэзідэнце Рэспублікі Беларусь.
Быў першым намеснікам генеральнага дырэктара брэсцкага канцэрна «Мясамалпрам», шэсць гадоў узначальваў ААТ «Пінскі мясакамбінат». З 2014 па 2018 год быў старшынёй Пінскага гарвыканкама, пасля гэтага стаў гендырэктарам ААТ «Белсолад».
Што адбывалася на птушкафабрыцы нядаўна
Нагадаем, у канцы жніўня стала вядома, што былога кіраўніка найбуйнейшай птушкафабрыкі «Дружба» ў Баранавічах Васіля Маркевіча затрымалі за хабар памерам 6,5 тысячы даляраў. Незадоўга да гэтага яго знялі з пасады.
Пасля гэтага скандалы вакол прадпрыемства не скончыліся. У верасні пакупнікі пачалі скардзіцца, што з крамаў пачалі знікаць цэлыя тушкі бройлераў — у продажы можна было знайсці толькі разборку, паўфабрыкаты і паўтушкі, якія каштуюць значна даражэй. На птушкафабрыцы растлумачылі, што прынялі рашэнне наогул зняць цэлую тушку з вытворчасці: выпускаць яе аказалася эканамічна нявыгадна.
На сітуацыю з разабранай птушкай звярнулі ўвагу ўрад і Лукашэнка, які раскрытыкаваў хітрасць вытворцы і запатрабаваў «дзейсных мераў».
Неўзабаве МАРГ падрыхтавала спецыяльную пастанову, якая датычыць рэгулявання цэн на мяса курэй і частак тушкі куранят-бройлераў. У прыватнасці, цяпер кошт дзвюх паўтушак, пярэдняй і задняй чвэрткі тушкі не мусіць перавышаць кошту самой тушкі, а кошт іншых частак тушкі — кошту тушкі, павялічанага на 10%.
Пракуратура ж за хітрасці з «расчляненнем» курыных тушак на «Дружбе» завяла крымінальную справу: службовых асобаў птушкафабрыкі абвінавачваюць у перавышэнні службовых паўнамоцтваў.