На супрацоўніцу аднаго з мінскіх салонаў прыгажосці завялі адміністрацыйную справу праз тое, што яна падчас праверкі падатковай закрыла ноўтбук. Пра гэта паведамляе ўпраўленне аператыўных мерапрыемстваў інспекцыі Міністэрства па падатках і зборах па Мінску. Расказваем падрабязнасці гэтай гісторыі.
Падчас аператыўнай праверкі салона прыгажосці адміністратар закрыла ноўтбук, які кампанія выкарыстоўвала для ўліку фінансавых аперацый з кліентамі. Як удакладняюць падаткавікі, спецыялістка зрабіла гэта, «не маскіруючы сваіх дзеянняў».
«У выніку гэтага адбылося блакаванне аперацыйнай сістэмы і наступны ўвод пададзенага пароля сістэмы не разблакаваў, то-бок адміністратар фактычна абмежавала доступ правяральнікам да інфармацыйнай базы дадзеных салона прыгажосці», — расказваюць ва ўпраўленні.
За закрыты ноўтбук на адміністратара салона прыгажосці завялі адміністрацыйную справу «па вельмі рэдкім» артыкуле КаАП — «Перашкода правядзенню праверкі, экспертызы» (артыкул 24.2). Ён прадугледжвае штраф ад дзесяці да трыццаці базавых велічынь (ад 370 да 1110 рублёў).
«У „сухім астатку“ ў работніка нервовыя перажыванні, штраф і „драўляны ордэн“ за адданасць», — адзначаюць ва ўпраўленні і дадаюць, што, нягледзячы на закрыты ноўтбук, «знайшлі залаты ключык да каштоўнай інфармацыі».
Падаткавікі тлумачаць, што падчас іх праверкі работнік мусіць даць тлумачэнні па пытаннях, якія ўваходзяць у кола яго службовых абавязкаў. «Адмова ад тлумачэнняў, як і загадзя ілжывыя тлумачэнні цягнуць адміністрацыйную адказнасць, — заяўляюць ва ўпраўленні. — Работнік не мае права перашкаджаць упаўнаважаным службовым асобам падатковых органаў пры правядзенні кантрольных мерапрыемстваў».