Паездку на перамовы з расійскім бокам у Беларусь у сакавіку мінулага года назваў у інтэрв'ю іспанскай газеце La Razón найгоршым днём у сваім жыцці міністр абароны Украіны Аляксей Рэзнікаў.
Кіраўнік украінскага абароннага ведамства падкрэсліў, што яму было вельмі складана пагадзіцца на прапанову прэзідэнта Украіны Уладзіміра Зяленскага паехаць на тую сустрэчу:
— Я думаю, што найгоршым днём або самым цяжкім рашэннем было быць у складзе ўкраінскай дэлегацыі, якая адправілася ў Беларусь пасля першых чатырох дзён вайны. Мэта была ў стварэнні гуманітарных калідораў для выратавання жыццяў мірных жыхароў. Было вельмі цяжка сказаць «так» прэзідэнту, калі ён папрасіў мяне, бо я адчуваў глыбокую нянавісць да расіян. І як перамоўшчык я ведаю, што гэта эмоцыя, якая не прыносіць карысці. Гэта было жудасна — паціснуць руку ворагу. Было чатыры сустрэчы: тры ў Беларусі і адна ў Турцыі. Скажу вам, што ў першых трох мы зусім не адчувалі сябе ў бяспецы і нават сумняваліся, што вернемся дадому, — расказаў Рэзнікаў.
На пытанне журналіста, ці ідзе цяпер гаворка пра перамовы з расіянамі, міністр абароны Украіны адказаў адмоўна.
Аляксей Рэзнікаў таксама паведаміў у інтэрв'ю, што пасля перамогі Украіны ў вайне з Расіяй хоча пайсці ў адстаўку.
— Ах, гэта мая мара! І яшчэ больш — мара маёй жонкі. Яна плакала, калі мяне прызначылі міністрам, гэта кажа пра ўсё. Мы чакаем дня перамогі, таму што гэта дазволіць мне падпісаць заяву аб адстаўцы і вярнуцца ў прыватны сектар. Гэты этап майго жыцця быў вельмі, вельмі цяжкім, — заявіў ён.
Чытайце таксама
