У дачыненні да Арцёма Лябедзькі, сына палітыка Анатоля Лябедзькі, узбудзілі крымінальную справу. Пра гэта яго бацька ў суботу распавёў у Facebook.
Арцёма Лябедзьку перавялі з ізалятара на Акрэсціна ў СІЗА-1 на вуліцы Валадарскага.
«Хлуслівыя, ад першай буквы да апошняга слова, пратаколы адміністрацыйнай справы і 30 содняў здзеку і катаванняў у самай мярзотнай турме Еўропы. Цяпер фабрыкацыя крымінальнай справы. Вышэйшы пілатаж бесчалавечнасці і мярзотнасці. Свядома, мэтанакіравана ідуць па жывых людзях, па сям'і, па дзіцяці», — напісаў Анатоль Лябедзька.
Як удакладнілі ў праваабарончым цэнтры «Вясна», мужчыну абвінавачваюць у фінансаванні экстрэмісцкай дзейнасці (артыкул 361−2 Крымінальнага кодэксу).
«За сваё жыццё я перажываў самыя розныя эмоцыі і пачуцці, але нянавісць толькі зараз. І нічога з гэтым зрабіць немагчыма. Яна цяпер мой спадарожнік па жыцці», — прызнаўся бацька Арцёма.
Нагадаем, 37-гадовага Арцёма Лябедзьку, бацьку малалетняй дачкі, затрымалі ў Мінску 28 сакавіка пасля вобшуку ў яго дома. Яму далі 15 сутак па артыкуле пра дробнае хуліганства, пасля гэтага зноў асудзілі на 15 сутак за непадпарадкаванне міліцыі, нібыта аказанае пры затрыманні.
Як распавёў Анатоль Лябедзька ў інтэрв'ю «Зеркалу», незадоўга да арышту Арцёма да яго маці ў Менску прыходзілі сілавікі, паведамлялі, што Анатоль у вышуку па некалькіх крымінальных справах, і цікавіліся сынам. Палітык упэўнены, што Арцёма затрымалі толькі з-за яго бацькі, бо ён ні ў якой палітычнай актыўнасці не ўдзельнічаў і не парушаў закон.
Сам Анатоль Лябедзька, які шмат гадоў быў лідарам АГП — адной з ключавых апазыцыйных партыяў, знаходзіцца ў эміграцыі з кастрычніка 2021 года. Ён з’яўляецца прадстаўніком Святланы Ціханоўскай па пытаннях канстытуцыйнай рэформы.