На 1 траўня афіцыйна беспрацоўнымі ў Беларусі лічыліся 5,7 тыс. чалавек. Месяц таму — 5,6 тыс. Размова пра тых людзей, якія вырашылі зарэгістравацца ў цэнтрах занятасці. Гэта вынікае са звестак Мінпрацы пра сітуацыю з занятасцю і беспрацоўем у нашай краіне.
Больш за ўсё беспрацоўных на пачатак траўня было ў Мінску — 28,3 тыс. чалавек, а менш за ўсё — у Віцебскай і Магілёўскай абласцях (12,4 і 11,5 тыс. чалавек адпаведна). Для параўнання: у Мінскай вобласці — 17,2 тыс., у Гродзенскай — 14,7 тыс., Гомельскай — 13,1 тыс., а ў Брэсцкай — 13 тыс.
Пры гэтым фактычнае беспрацоўе, якое разлічваецца па метадалогіі Міжнароднай арганізацыі працы, у Беларусі істотна перавышае афіцыйнае.
На пачатак траўня, паводле звестак Мінпрацы, у цэлым па краіне налічвалася 110 137 вакансій. Іх колькасць амаль на 6,2 тыс. большая, чым месяц таму. «Попыт на працаўнікоў па рабочых прафесіях склаў 63,5% ад агульнай колькасці вакансій», — удакладняюць у Мінпрацы.
Колькасць вакансій на пачатак гэтага месяца — антырэкорд як мінімум з пачатку 2010 года. Да прыкладу, на пачатак траўня 2022 года ў цэлым па краіне налічвалася 91 526 вакансій, на 1 траўня 2021-га — 74 338 вакансій, а 2015-га — 26 549 вакансій.