Адвакат Антон Гашынскі расказаў Deutsche Welle падрабязнасці вызвалення яго падабароннай Соф'і Сапегі, якую ў Беларусі асудзілі на 6 гадоў пазбаўлення волі, а ў чэрвені раптоўна вызвалілі пасля года ў калоніі.
У самым пачатку расследавання справы Сапега заключыла пагадненне са следствам, але, на думку адваката, вялікіх ільгот гэта ёй не прынесла.
«Пры гэтым ёй давялося даць прызнальныя паказанні, перадаць доступ да носьбітаў інфармацыі, праз што пацярпела шмат людзей, магчыма, яшчэ больш пацярпіць. Інфармацыя, якая там захоўвалася, пацягнула або можа пацягнуць неспрыяльныя наступствы», — лічыць Антон Гашынскі.
Максімальна Сапезе пагражала 12 гадоў пазбаўлення волі, суд прызначыў ёй роўна палову, бо яна выканала ўмовы пагаднення. Пасля заканчэння папярэдняга следства было пададзенае хадайніцтва наконт вызвалення ад крымінальнай адказнасці, але ёй адмовілі, пасля чаго судзілі. Знаходзячыся ў калоніі, Сапега падала прашэнне пра памілаванне, аднак камісія прагаласавала супраць.
Другі раз з хадайніцтвам пра памілаванне Сапега не звярталася да Лукашэнкі, кажа Антон Гашынскі. Быў пачаты працэс перадачы ў Расію — родныя дамагаліся таго, каб Сапега як грамадзянка РФ адбывала пакаранне там. Як яе маглі памілаваць? Адвакат нагадвае, што ў законе ёсць словы «калі іншае не ўстаноўлена прэзідэнтам» — менавіта гэтым пунктам і скарысталіся.
Адразу пасля вызвалення дзяўчына паляцела ў Дубай, цяпер яна адпачывае ў Тайландзе. Ці плануе яна вяртацца ў Беларусь ці Расію, Гашынскі не ведае.