Міністр унутраных справаў Літвы Агне Білатайтэ распарадзілася ўзмацніць кантроль і праверкі асобаў, якія заязджаюць з Беларусі і Расіі. Пра гэта гаворыцца ў паведамленні МУС Літвы.
Памежнікі будуць больш пільна правяраць дакументы і візы таксама ў асобаў, якія едуць праз тэрыторыю Літвы транзітам.
«У выпадку змены ўзроўню пагрозаў у рэгіёне дзяржаўная мяжа таксама гатовая да закрыцця», — гаворыцца ў паведамленні літоўскага ведамства.
У МУС Літвы таксама адзначылі, што з 1 студзеня 2023 года ў Літву не пусцілі 1200 грамадзян Беларусі і 1300 грамадзян Расіі.
Як паведамляе BNS са спасылкай на прадстаўніка МУС Літвы Дайву Ульбінайтэ, узмацненне мераў звязанае з «агульнай сітуацыяй з бяспекай у рэгіёне». Асцярогі што да сітуацыі з бяспекай у рэгіёне ўзмацніліся пасля таго, як з’явілася інфармацыя пра размяшчэнне ў Беларусі падраздзяленняў ПВК Вагнера.