З 1 кастрычніка ў Беларусі знізяць бязмытныя ліміты на ўвоз тавараў з-за мяжы наземным транспартам і замежныя пасылкі. Цяперашнія нормы з’явіліся ў красавіку 2022-га на ўзроўні краін ЕАЭС, а пазней іх двойчы падаўжалі. Паглядзелі, колькі трэба заплаціць, калі перавысіць гэтыя бязмытныя ліміты.
Як зменяцца ліміты на ўвоз тавараў і колькі трэба заплаціць за іх перавышэнне
Бязмытная столь па лімітах на ўвоз тавараў з-за мяжы праз наземныя межы цяпер складае 1000 еўра і 31 кілаграм. З кастрычніка іх хочуць зрэзаць да 500 еўра і 25 кілаграмаў.
Калі перавысіць ліміты, то трэба будзе заплаціць пошліну ў памеры 30% ад кошту, але не менш за 4 еўра за 1 кілаграм перавышэння. Што да правозу цыгарэт, то, як і цяпер, так і ў красавіку ліміт — 200 цыгарэт, або 50 цыгар (цыгарыл), або 250 г тытуню (або гэтыя тавары ў асартыменце агульнай вагой не больш за 250 грамаў на аднаго поўнагадовага). Абмежаванні па алкаголі — 3 літры на аднаго поўнагадовага.
Да прыкладу, калі паспрабаваць увезці новую пральную машыну LG коштам 1120 еўра і вагой 65,15 кг, то за перавышэнне лімітаў давядзецца заплаціць 482,1 рубля. Мытную пошліну могуць узяць з перавышэння як вагі, так і кошту. Але ў любым выпадку возьмуць тую суму, якая большая. У канкрэтна гэтым выпадку залічаць перавышэнне па вазе. Каб разлічыць плацёж, бяруць перавышаную вагу (у дадзеным выпадку гэта 34,15 кг) і памнажаюць на 4 еўра (па курсе 3,4561 рубля на 30 жніўня), атрымліваецца 472,1 рубля. Да гэтай сумы трэба дадаць мытны збор — 10 рублёў.
Пасля ўразання бяспошлінных лімітаў гэтая сума вырасце.
Якія ліміты на пасылкі і колькі трэба заплаціць за іх перавышэнне
Бязмытныя ліміты на пасылкі з-за мяжы цяпер — 1000 еўра і 31 кілаграм на адну бандэроль. З кастрычніка іх скароцяць да 200 еўра і 31 кілаграма за адно адпраўленне.
За перавышэнне лімітаў трэба заплаціць 15% ад кошту, але не менш за 2 еўра за 1 кг вагі. Збор бяруць з перавышэння, а не з усяго кошту.
Калі замовіць пасылку коштам 1200 еўра і вагой 5 кг, то трэба будзе заплаціць мытныя пошліны і падаткі агулам на 103,68 рубля.
Чытайце таксама
