Паводле інфармацыі, якую сябра назіральнай рады BYPOL Аляксандр Кныровіч паведаміў у эфіры «Еўрарадыё», аўдыт паказаў, што ў 2022 годзе фінансавыя паступленні арганізацыі склалі больш за 1 мільён 850 тысяч польскіх злотых. Па сярэднім курсе Нацыянальнага банка Польшчы за мінулы год гэта амаль 300 тысяч еўра.
Больш за 80% атрыманых сродкаў (1 млн 24 тысячы злотых, або 222 тысячы еўра) пайшлі на аплату працы супрацоўнікаў. Сярэдні заробак у BYPOL у 2022 годзе склаў 5690 злотых, або амаль 1240 еўра. Больш за 430 тысяч злотых (93 400 еўра) арганізацыя заплаціла Упраўленню сацыяльнага страхавання і падатковым службам Польшчы.
Аляксандр Кныровіч у эфіры «Еўрарадыё» таксама паведаміў, што аўдыт BYPOL праводзіла кампанія Audit C-Land. Паводле яе сайта, гэта адна з найстарэйшых аўдытарскіх арганізацый Польшчы, якая працуе на рынку з 1992 года.
Нагадаем, сёння на YouTube-канале BYPOL з’явілася відэа, у якім прадстаўнік гэтай арганізацыі Станіслаў Лупаносаў паведаміў пра завяршэнне аўдыту. Неабходнасць у ім узнікла пасля расколу BYPOL, які суправаджаўся абвінавачаннямі часткі супрацоўнікаў у фінансавай несумленнасці кіраўніцтва арганізацыі.
Уладзімір Жыгар, прадстаўнік BELPOL, якая адкалолася ад BYPOL, сёння ў каментары «Люстэрку» заявіў, што ён і яго калегі не задаволеныя праведзеным аўдытам, бо той ахопліваў справаздачнасць толькі за 2022 год, у той час як асноўная частка прэтэнзій датычыла выдаткаў за 2023-ы. Жыгар таксама сказаў «Люстэрку», што прадстаўнікі кіраўніцтва і назіральнай рады BYPOL не звярталіся да BELPOL з прапановамі ўдакладніць пытанні, адказы на якія мусіў даць аўдыт арганізацыі.
Чытайце таксама
