Урад увёў чарговыя змены што да бізнесу з «недружалюбных» краін. Гэтым разам чыноўнікі прапісалі, як будзе працаваць спецыяльны збор з замежных інвестараў, якія хочуць прадаць свой бізнес у Беларусі, але не могуць гэта зрабіць праз уведзеныя абмежаванні. Падрабязнасці пра гэтыя змены расказала Дзяржкаммаёмасць. Нагадаем, у кастрычніку мінулага года Аляксандр Лукашэнка ўвёў для іх камісію не менш за 25% ад рынкавага кошту прадаваных акцый або нерухомасці.
У кастрычніку мінулага года для тых замежных інвестараў з «недружалюбных» краін, якія спрабуюць згарнуць свой бізнес у нашай краіне, але не могуць гэта зрабіць праз уведзеныя абмежаванні, увялі спецыяльны збор. Такія бізнесоўцы мусяць заплаціць у бюджэт унёсак у памеры не менш за 25% ад рынкавага кошту адчужальных доляў (акцый) або нерухомай маёмасці.
Цяпер жа ўрад падрыхтаваў спецыяльную пастанову, у якой прапісалі, які бізнес можа прэтэндаваць на выплату такога збору і як гэта можна зрабіць. Пра гэта паведамляе Дзяржкаммаёмасць. Каб атрымаць дазвол на продаж бізнесу, трэба звярнуцца ў абласныя выканкамы або Мінгарвыканкам па месцы рэгістрацыі юрыдычнай асобы з адпаведнай заявай.
Чыноўнікі на месцах павінныя ўхваліць (ці не) заяву, а таксама вызначыць памер унёску ў дзяржбюджэт і тэрміны, калі яго трэба зрабіць. Але камісія мусіць складаць не менш за 25% ад рынкавага кошту адчужальных доляў або нерухомай маёмасці.
У некаторых выпадках гэты збор могуць вярнуць у будучыні. «Вяртанне выплачанага ўнёску прадугледжваецца толькі ў выпадку неажыццяўлення (невыканання) угоды па адчужэнні нерухомай маёмасці юрыдычнымі асобамі, у статутных фондах якіх доля ўласнасці асобаў з замежных дзяржаваў складае 25% і больш», — удакладняе Дзяржкаммаёмасць.
Чытайце таксама
