Адміністрацыя прэзідэнта ЗША распрацоўвае новую стратэгію па Украіне, акцэнт якой зроблены не на адваяванні захопленай Расіяй тэрыторыі, а на тым, каб дапамагчы Кіеву адбіць новыя наступы арміі РФ. Пра гэта паведаміла амерыканскае выданне The Washington Post (WP) са спасылкай на чыноўнікаў Белага дома, піша Deutsche Welle.
Паспяховая тактыка апошняга часу
Заходнія саюзнікі Кіева хочуць, каб ён засяродзіўся на тактыцы, якая апошнім часам была паспяховай — вядзенні агню на вялікія адлегласці, стрымліванні Чарнаморскага флоту Расіі, а таксама звязванні расійскіх сіл у анексаваным Крыме з дапамогай ракетных удараў і дыверсій, адзначае газета. Захад спадзяецца, што ў 2024 годзе Украіне ўдасца пазбегнуць тэрытарыяльных стратаў, піша WP.
Ідэя Вашынгтона палягае на тым, каб скіраваць Украіну «на іншую траекторыю», каб да канца 2024 года яна стала значна мацнейшай, растлумачыў суразмоўца WP. «Цалкам відавочна, што ім (Узброеным сілам Украіны. — Заўв. рэд.) будзе цяжка паспрабаваць дамагчыся такога ж сур’ёзнага рыўка на ўсіх франтах, які яны спрабавалі зрабіць летась», — дадаў ён.
Ранейшая стратэгія — навучанне УСУ і пастаўка зброі
Новая стратэгія істотна адрозніваецца ад леташняй, калі ЗША разам з саюзнікамі адпраўлялі Кіеву сучаснае абсталяванне і вучылі ўкраінскіх вайскоўцаў, разлічваючы, што з дапамогай гэтых захадаў удасца хутка адціснуць расійскія сілы з тэрыторый, якія тыя ўтрымліваюць на ўсходзе і поўдні Украіны, піша WP. Аднак гэтыя намаганні пацярпелі няўдачу — шмат у чым з прычыны ўмацаваных расійскіх мінных палёў і траншэй на перадавой, адзначае газета.
Пагадненні пра гарантыі бяспекі для Украіны
План Злучаных Штатаў — гэта частка намаганняў трох дзясяткаў краін — саюзніц Украіны, прычым кожная з іх рыхтуе дакумент з канкрэтнымі абавяннямі (па падтрымцы Украіны. — Заўв. рэд.) на перыяд да дзесяці наступных гадоў, падкрэслівае газета. У сярэдзіне студзеня Вялікабрытанія падпісала з Украінай дамову пра гарантыі бяспекі, Францыя таксама збіраецца заключыць аналагічнае пагадненне з украінскім бокам.
ЗША разлічваюць апублікаваць уласную дамову з 10-гадовымі абавязаннямі гэтай вясной, паказвае WP. Паводле звестак выдання, пагадненне будзе гарантаваць Украіне падтрымку кароткатэрміновых ваенных аперацый, а таксама стварэнне вайсковага патэнцыялу, які зможа стрымліваць агрэсію з боку Расіі. Акрамя таго, дакумент будзе ўключаць праграмы, якія дапамогуць абараніць, аднавіць і пашырыць прамысловую і экспартную базу Украіны, а таксама дапамагчы ёй правесці палітычныя рэформы, неабходныя для інтэграцыі ў заходнія інстытуты.
Чытайце таксама
