Аляксандр Лукашэнка 10 красавіка ляціць з рабочым візітам у Расію, паведамілі ў прэс-службе беларускага палітыка.
У Маскве 11 красавіка адбудзецца сустрэча з прэзідэнтам Расіі Уладзімірам Пуціным у фармаце «сам-насам».
Як расказалі ў прэс-службе, бакі абмяркуюць «тэматыку развіцця супрацоўніцтва дзвюх краін у розных сферах, пытанні, якія патрабуюць разгляду на найвышэйшым узроўні».
«У цэнтры ўвагі на перамовах таксама будзе рэгіянальная і міжнародная абстаноўка, каардынацыя дзеянняў па рэагаванні на наяўныя выклікі і пагрозы», — адзначылі ў прэс-службе.
12 красавіка ў Аляксандра Лукашэнкі і Уладзіміра Пуціна «плануецца сумеснае мерапрыемства з нагоды Дня касманаўтыкі». Палітыкі падвядуць вынікі місіі на Міжнародную касмічную станцыю, якая адбылася нядаўна, пагутараць з касманаўтамі, абмяркуюць далейшыя перспектывы супрацоўніцтва ў касмічнай сферы.
Гэты візіт Лукашэнкі не анансаваўся. Больш за тое, старшыня Прэзідыума НАН Беларусі Уладзімір Гусакоў раней заявіў, што менавіта 11 красавіка Аляксандр Лукашэнка правядзе сустрэчу ў Палацы Незалежнасці, падчас якой мае адбыцца ўзнагароджанне беларускай касманаўткі Марыны Васілеўскай, якая 6 красавіка вярнулася на Зямлю з МКС.
Найбліжэйшы візіт Лукашэнкі ў Маскву быў запланаваны на 8 траўня для ўдзелу ў юбілейным саміце Еўразійскага эканамічнага саюза (ЕАЭС). Яго анансаваў амбасадар Беларусі ў РФ Дзмітрый Крутой.