Аляксандр Лукашэнка расказаў пра завядзенне крымінальнай справы супраць экс-намесніка міністра энергетыкі Міхаіла Міхадзюка, цяпер ён знаходзіцца ў СІЗА, паведамляе яго прэс-служба.
Справу завялі за «спрыяльнае вырашэнне пытанняў па выбары замежнай кампаніі ў якасці падрадчыка для будаўніцтва і мадэрнізацыі высакавольтных падстанцый у Беларусі».
«То-бок на табе падстанцыю, ідзі мадэрнізуй, але ты мне дай хабар. Дзясяткі тысяч даляраў. Чалавек усё жыццё адпрацаваў у міністэрстве. Дзе ён цяпер?» — задаў пытанне Лукашэнка.
Аказалася, што Міхаіл Міхадзюк знаходзіцца ў СІЗА.
Нагадаем, намеснік міністра энергетыкі Міхаіл Міхадзюк быў адпраўлены ў адстаўку 28 снежня мінулага года.
Ён займаў пасаду намесніка міністра энергетыкі Беларусі 18 гадоў. У ведамстве ён кіраваў працай Дэпартамента па ядзернай энергетыцы, курыраваў дзейнасць Беларускай АЭС, «Белэнерга», «Белпалівагаза» і іншых прадпрыемстваў, якія ўваходзяць у сістэму міністэрства.