«Прыёрбанк» аптымізуе некаторыя свае падраздзяленні. Пра гэта паведамляецца на сайце фінустановы. Нагадаем, напярэдадні стала вядома, што ў банка змяніўся ўласнік.
З 1 кастрычніка ў Маладзечне (на вуліцы Вялікі Гасцінец, 143) цэнтральнае банкаўскае ўпраўленне № 107 рэарганізуюць у дадатковы офіс 101/7. «30 верасня аддзяленне будзе працаваць да 13.00, а 1 кастрычніка пачне сваю працу ў 11.00», — удакладняе фінустанова.
Таксама банк папярэджвае кліентаў, што 30 верасня не будзе працаваць аддзяленне ў Смаргоні (на вуліцы Савецкай, 25В). Прычына — яго перайменаванне.
«Для аперацый з наяўнымі грашовымі сродкамі рэкамендуем выкарыстоўваць банкаматы, аплатна-даведкавыя тэрміналы і тэрміналы па прыёме выручкі. Іх пералік можна знайсці на сайце ў раздзеле „Карта банкаматаў і аддзяленняў“», — рэкамендуе фінустанова.
З 1 кастрычніка ў Мінску дыстанцыйнае працоўнае месца № 100/17 (на праспекце Незалежнасці, 172) будзе рэарганізаванае ў дадатковы офіс. З гэтай прычыны ў першы дзень наступнага месяца аддзяленне пачне працаваць пазней, чым звычайна — з 11.00.
Раней у «Прыёрбанку» растлумачылі, што «ЦБП выконвае ўвесь пералік аперацый банка, у той час як дыстанцыйнае працоўнае месца, напрыклад, можа не быць абсталяванае касамі, таму выконвае не ўсе аперацыі».
Нагадаем, 20 верасня стала вядома, што аўстрыйская кампанія Raiffeisen Bank International (RBI) прадае акцыі «Прыёрбанка» інвестару з ААЭ. Гэтую фінустанову набыла кампанія SOVEN 1 Holding Limited.
«У выніку транзакцыі 87,74% акцый „Прыёрбанка“ пяройдзе SOVEN 1. Як частка гэтага пагаднення SOVEN 1 і Raiffeisen Bank International падпісалі дамову куплі-продажу акцый і будуць працаваць разам з „Прыёрбанкам“ над тым, каб дасягнуць поўнага завяршэння ўгоды ў 4-м квартале 2024 года», — паведамляў «Прыёрбанк».
Чытайце таксама
