Сенатары ўхвалілі законапраект «Аб амністыі ў сувязі з Днём народнага адзінства». Яго ў Савеце Рэспублікі прадставіў міністр унутраных справаў Іван Кубракоў, паведамляе прэс-служба МУС.
«У нашай дзяржаве заўсёды прымяняецца прынцып гуманізму ў дачыненні да асобаў, якія адбываюць крымінальнае пакаранне. Дзяржава не толькі карае, але і дае магчымасць асуджаным, якія выправіліся, датэрмінова вызваліцца ад адбывання пакаранняў», — сказаў кіраўнік МУС.
Рашэнне аб прымяненні амністыі будзе прымацца ў дачыненні да кожнай асобы індывідуальна.
Нагадаем, 6 верасня Аляксандр Лукашэнка правёў нараду, на якой абмяркоўвалася амністыя для асуджаных па «палітычных» справах, якую збіраліся прымеркаваць да Дня народнага адзінства. Тады ён прызнаў, што сярод асуджаных па пратэсных справах ёсць самыя розныя людзі, у тым ліку тыя, хто здзейсніў нязначныя з пункту гледжання беларускіх уладаў «злачынствы». Пасля апублікаванага законапраекта аб амністыі стала ясна, што паводле «палітычных» артыкулаў выйдуць адзінкі, але ў іх ёсць права звярнуцца з хадайніцтвам аб памілаванні на імя Лукашэнкі. 10 лістапада законапраект аб амністыі адразу ў двух чытаннях прынялі ў Палаце прадстаўнікоў.
Цяпер законапраект адправіцца на подпіс да Аляксандра Лукашэнкі. Законапраект стане законам і ўступіць у сілу пасля яго афіцыйнага апублікавання.
