Ведаеце, гэты матэрыял мусіў быць іншым. Мы доўга думалі, як падысці да тэмы, як расказаць вам пра «расследаванне» БТ пра TUT.BY. У выніку дамовіліся выпусціць тэкст пра яго аўтара, прапагандыстку Ксенію Лебедзеву, якая вельмі шмат хлусіць, — вось ён. Тут жа былыя тутбаеўцы з каманды «Люстэрка» мусілі расказаць, што думаюць пра гэты фільм. Вось ён выйшаў, мы яго паглядзелі. І, на жаль (або на шчасце), у нас нічога не выйшла — гэтая праца была настолькі неразумнай, таннай і агіднай, што нашая задума правалілася. Проста незразумела, як абмяркоўваць сказанае Лебедзевай, нашымі былымі калегамі, якіх прымусілі зняцца ў «расследаванні», або следчым, які вельмі здзіўляецца таму, як працуюць сучасныя кампаніі. Замест гэтага мы раскажам вам, у чым, паводле версіі беларускай прапаганды, вінаваты TUT.BY. Гэта як найлепей пакажа ўвесь абсурд фільма, які закліканы падрыхтаваць беларусаў да сённяшняга судовага рашэння па Марыне Золатавай і Людміле Чэкінай.
У фільме Лебедзева і яе суразмоўцы амаль паўтары гадзіны расказваюць, як TUT.BY негатыўна ўплываў на Беларусь, а яго кіраўнікі на ўсім гэтым узбагачаліся і цягам многіх гадоў былі зацікаўленыя ў пагаршэнні сітуацыі ў нашай краіне.
Такім чынам, вось спіс таго, у чым вінаваты TUT.BY паводле версіі дзяржпрапаганды:
- У маўклівых акцыях пратэсту ў 2011 годзе;
- Дэвальвацыях у Беларусі;
- Майдане ва Украіне і пачатку вайны ў 2014 годзе;
- Людскім абурэнні дзеяннямі ўладаў у сувязі з COVID-19;
- Нежаданні станавіцца з «міліцыяй у баявы парадак і паказаць праўду»;
- Як пажартаваў (ці не) наш калега — ва ўсіх галоўных праблемах Беларусі наогул і вашай сям'і ў прыватнасці за апошнія 20 гадоў.
Усё гэта ў першую чаргу адрасавалася ў бок галоўнага рэдактара TUT.BY Марыны Золатавай і генеральнага дырэктара Людмілы Чэкінай. Людзей, якіх судзяць у закрытым рэжыме і якія ніяк не могуць адказаць на гэтыя нават не абвінавачанні, а паклёп з боку ўладаў, следчых, пракурораў і прапагандыстаў.
Міла, Марына, мы вамі ганарымся. Вашая прынцыповасць і стойкасць — прыклад для кожнага з нас. Мы з гонарам працягваем вашую справу — расказваем беларусам сапраўдныя навіны, нягледзячы ні на што.
