Кіраўнік КДБ Іван Церцель 9 траўня расказаў, што яго ведамства «спыніла спробы здзяйснення тэрактаў» напярэдадні Дня Перамогі. На наступны дзень тэлеканал АНТ апублікаваў анонс вечаровага сюжэту з падрабязнасцямі інцыдэнту.
У роліку паказалі некалькі чалавек, якія, імаверна, былі затрыманыя КДБ. Вядоўца АНТ расказала, што «9 траўня ў Беларусі планавалі ажыццявіць адразу некалькі тэрактаў», а «сляды заказчыка вядуць ва Украіну».
— Вядома, што выбуховыя прыстасаванні былі замаскаваныя пад бытавыя прыборы, якія прыбылі ў краіну з-за мяжы. У Беларусі іх атрымалі розныя людзі з адным заданнем — забраць і не задаваць лішніх пытанняў. А ў патрэбны час пасылкі мусілі актываваць, каб справакаваць ахвяры і ўскалыхнуць сітуацыю ў краіне, — паведамілі ў эфіры АНТ.
Адна з паказаных у роліку дзяўчат сказала, што яе «падставілі».
— У мяне няма словаў, хтосьці іх туды падклаў, — сказаў іншы ўдзельнік здымак, пасля чаго АНТ паказала кадры неапазнанай прылады з правадамі.
— Ён (мяркуючы з сюжэту — заказчык «тэракту». — Заўв. рэд.) сказаў, што гэта дапаможа захаваць мір паміж Беларуссю і Украінай, — сказала яшчэ адна дзяўчына, якую здымалі на фоне магільнай пліты на могілках.
Таксама ў роліку паказалі мужчыну ў вайсковай форме, які нешта даставаў з гаршчка з кветкамі паміж магіламі.
Усе падрабязнасці перадухіленых КДБ «тэрактаў» паабяцалі расказаць у фільме «Убойная посылка» ў вечаровым выпуску навін.
Нагадаем, Іван Церцель паведаміў, што ў Беларусі спынілі спробы здзяйснення тэрактаў напярэдадні 9 траўня.
— Гэта былі спробы арганізацыі тэрактаў на нашай тэрыторыі. І мы лічым, што гэта было прывязана менавіта да Дня Перамогі, — удакладніў кіраўнік КДБ.
2 траўня кіраўнік КДБ заяўляў, што ў Беларусі зробяць больш жорсткім контрразведвальны рэжым.
— Па ўказанні кіраўніка дзяржавы будзе прыняты шэраг мераў, звязаных з узмацненнем жорсткасці контрразведвальнага рэжыму. Гэта, я думаю, усім будзе зразумела, трэба для таго, каб працаваць на апярэджанне, на прафілактыку і не дапусціць у канчатковым выніку таго, што адбываецца побач з намі ў розных рэгіёнах, — заявіў кіраўнік КДБ.
Чытайце таксама
