Міжнародны інстытут кіравання і прадпрымальніцтва (МІКП) змяніў уласніка. Як даведалася «Люстэрка», гэта адбылося ў снежні 2023 года. Новыя ўладальнікі — грамадзяне Кітая. Расказваем, што ўдалося высветліць.
Міжнародны інстытут кіравання і прадпрымальніцтва — адна з найстарэйшых прыватных навучальных установаў у краіне, яна адкрылася ў 1993 годзе. Раней ВНУ называлася «Прыватны інстытут кіравання і прадпрымальніцтва».
Мяркуючы са звестак Адзінага дзяржрэгістра, інстытут заснавала ТАА «Асновы прадпрымальніцкай дзейнасці». Сярод яго відаў дзейнасці — вышэйшая адукацыя і здача ў арэнду ўласнай і арандаванай нерухомасці. Арганізацыя таксама з’явілася ў 1993 годзе. Тады сярод заснавальнікаў былі 23 чалавекі (усе яны — грамадзяне Беларусі). Да 2022 года спіс скараціўся да 12.
У кастрычніку 2022 года тыя самыя 12 заснавальнікаў, відавочна, прадалі «Асновы прадпрымальніцкай дзейнасці» грамадзяніну Кітая Пэнь Ланю. І ўжо ён валодаў кампаніяй да снежня 2023 года. Цікава, што ў снежні на тыдзень уласнікам кампаніі станавілася кітайскае ТАА «Цысіньван па кіраванні бізнесам Цэнду». Потым Пэнь Лань зноў стаў уладальнікам. А праз два тыдні ўласнікі змяніліся. Імі сталі двое кітайцаў — Хэ Дань і Ван Бо, кожнаму з якіх належыць па 50% бізнесу. Дырэктар арганізацыі — таксама грамадзянін КНР Хань Вэньюань.
Сярод кіраўніцтва самой ВНУ таксама ёсць кітайцы. Напрыклад, прарэктар па навучальнай рабоце — Чжан Пэнфэй. Рэктара, дарэчы, у Інстытуце пакуль няма. Да 2023 года ім быў кандыдат эканамічных навук Мікалай Сіняк.
У справаздачы пра прыбыткі і страты МІКП паведамляецца, што за мінулы год чысты прыбытак інстытута склаў 5,593 мільёна рублёў. У 2022 годзе страты склалі 109 тысяч рублёў.
Між тым у 2023/2024 навучальным годзе кошт навучання для беларускіх студэнтаў складае 4000 рублёў для вочнай формы навучання (1800 рублёў для завочнікаў). Для замежнікаў, якія хочуць вучыцца на рускай — 1800 даляраў (5751 рубель, тут і далей курс Нацбанка на 26 чэрвеня), а для тых, хто аддае перавагу англійскай — 2800 даляраў (8947 рублёў).
Мяркуючы са звестак бухгалтарскай справаздачы МІКП, цяпер у ВНУ працуе 54 чалавекі. Дакладнай колькасці студэнтаў у адкрытых крыніцах мы не знайшлі, аднак гэтым летам у інстытут плануюць набраць 79 першакурснікаў. Студэнтаў у ВНУ рыхтуюць па сямі спецыяльнасцях:
- бізнес-адміністраванне;
- менеджмент;
- эканоміка і кіраванне;
- правазнаўства;
- фінансы і крэдыт;
- бухгалтарскі ўлік, аналіз і аўдыт у прамысловасці;
- сусветная эканоміка.
Інстытут заяўляе, што супрацоўнічае з ВНУ ў Малайзіі, Тайландзе, Кітаі і Венгрыі. Акрамя таго ў 2022-м ён стаў партнёрам адукацыйнай карпарацыі Кітая Hope Education Group.
Днямі першы прарэктар Сяргей Мальчанка ўдзельнічаў у адкрыцці Міжнароднага альянсу вышэйшай прафесійнай адукацыі гарадоў-пабрацімаў Гуанчжоу, якое адбылося ў Кітаі. У сваім выступе ён расказаў пра МІКП і яго дасягненні.
— Візіт дэлегацыі МІКП у Кітай умацаваў адносіны з кітайскімі ВНУ і заклаў аснову для будучых праграм абмену, — напісана ў тэлеграм-канале навучальнай установы. — Інстытут плануе павысіць якасць адукацыі і падрыхтаваць новае пакаленне спецыялістаў, гатовых да працы на сусветным узроўні.
Чытайце таксама
