Над Эдуардам Бабарыкам пройдзе новы суд. Яго абвінавачваюць у непадпарадкаванні адміністрацыі калоніі, паведамляе праваабарончы цэнтр «Вясна».
Эдуарда Бабарыку абвінавачваюць у непадпарадкаванні адміністрацыі калоніі (ч. 2 арт. 411 КК Беларусі). Калі яго прызнаюць вінаватым, гэта можа павялічыць ягоны тэрмін за кратамі яшчэ на два гады.
Яго пачнуць судзіць 9 ліпеня ў Бабруйскім гарадскім судзе.
На жаль, досвед паказвае, што такія справы разглядаюцца не на карысць палітвязняў — некаторым такім чынам «давешваюць» гады зняволення на пастаяннай аснове.
Нагадаем, Эдуард Бабарыка 5 ліпеня 2023 года быў прызнаны вінаватым па ч. 2 арт. 243, ч. 6 арт. 16 і ч. 1 арт. 342, ч. 6 арт. 16 і ч. 3 арт. 130 КК (Ухіленне ад выплаты падаткаў, якое пацягнула нанясенне шкоды ў буйным памеры, дапамаганне ў арганізацыі групавых дзеянняў, якія груба парушаюць грамадскі парадак, і дапамаганне ў арганізацыі наўмысных дзеянняў, скіраваных на распальванне варожасці і разладу па прыкмеце сацыяльнай прыналежнасці).
Яму далі восем гадоў папраўчай калоніі ва ўмовах узмоцненага рэжыму са штрафам у памеры 5000 базавых велічынь (185 000 рублёў) без пазбаўлення права займаць пэўныя пасады або займацца пэўнай дзейнасцю. Вытворчасць па крымінальнай справе па ч. 2 арт. 235 КК («Адмыванне» сродкаў, атрыманых злачынным шляхам) была спыненая ў сувязі з «адмовай дзяржабвінаваўцы ад абвінавачання».
Эдуард Бабарыка быў затрыманы разам са сваім бацькам, Віктарам Бабарыкам, 18 чэрвеня 2020 года, утрымліваўся ў СІЗА КДБ.