Кіроўная партыя Польшчы «Права і справядлівасць» прапанавала вынесці на рэферэндум пытанне пра загародзе на польска-беларускай мяжы. Грамадзян краіны хочуць спытаць, ці падтрымліваюць яны яе ліквідацыю. Пра гэта ў акаўнце партыі ў Х (экс-Twitter) паведаміў міністр нацыянальнай абароны Польшчы Марыюш Блашчак.
Паводле міністра, адно з чатырох пытанняў, якія польскія ўлады хочуць вынесці на рэферэндум, гучыць так: «Ці падтрымліваеце вы ліквідацыю бар’ера на мяжы Польшчы з Беларуссю?»
— Народ вырашыць, ці будзе нашая мяжа і далей пастаянна абароненая, ці будзе яна бяспечная, — дадаў Блашчак.
Рэферэндум пройдзе ў Польшчы 15 кастрычніка ў перыяд парламенцкіх выбараў, рашэнне пра яго правядзенне Сейм разгледзіць 17 жніўня. Сярод іншых пытанняў, якія хочуць задаць палякам, — ці падтрымліваюць яны павышэнне пенсійнага ўзросту да 60 гадоў для жанчын і да 65 гадоў для мужчын, продаж дзяржпрадпрыемстваў і прыём нелегальных імігрантаў згодна з прынятымі ў ЕС працэдурамі рассялення.
Нагадаем, у Варшаве вырашылі пабудаваць загароду на мяжы з Беларуссю пасля рэзкага павелічэння плыні мігрантаў з краін Блізкага Усходу. Заходнія палітыкі абвінавачваюць беларускія ўлады ў тым, што тыя ўвозяць нелегалаў у краіну з мэтай далейшай перапраўкі ў ЕС.
Першыя платы з калючага дроту палякі пачалі ўзводзіць на мяжы з Беларуссю яшчэ летам пазамінулага года, у разгар міграцыйнага крызісу. А ў канцы студзеня 2022 года Польшча пачала будаваць металічную сцяну вышынёй 5,5 метра і даўжынёй 186 кіламетраў. Работы былі цалкам скончаныя да пачатку кастрычніка мінулага года.
Пасля гэтага каардынатар польскіх спецслужбаў Станіслаў Жарын заявіў, што цяпер польская мяжа — самая абароненая ў Еўропе, а незаконны ўезд у краіну з боку Беларусі цалкам заблакаваны.
Беларускія ўлады і навукоўцы асуджаюць пабудову плота і заяўляюць, што ён наносіць шкоду расліннаму і жывёльнаму свету.
Крытыка гучыць і з процілеглага боку загароды. У сваім відэазвароце па пытанні рэферэндуму Блашчак дэманструе эпізод інтэрв'ю з незалежнай дэпутаткай Еўрапарламента і прэзідэнткай польскай гуманітарнай арганізацыі Янінай Ахойскай-Аконьскай, дзе яна дапусціла, што плот у будучыні будзе знесены. Раней яна таксама выказвала сумневы ў мэтазгоднасці будаўніцтва загароды на мяжы з Беларуссю.