У Маскве здзейснены замах на афіцэра Узброеных сіл Расіі. Як паведамляе тэлеграм-канал Mash, яму адарвала ступні ног.
Выбух адбыўся раніцай у сераду, 24 ліпеня, на поўначы Масквы. На апублікаваным Mash відэа бачна, што дэтанацыя адбылася пасля таго, як мужчына сеў на месца кіроўцы Toyota Land Cruiser. Мяркуецца, што самаробнае выбуховае прыстасаванне заклалі на дно, у раёне кіроўцы. Яно спрацавала, калі ахвяра ўключыла запальванне, піша тэлеграм-канал. Паводле яго інфармацыі, пацярпелы — намеснік начальніка перадавальнага радыёцэнтра вайсковай часткі спадарожнікавай сувязі Андрэй Т., і ён перавязаў сябе, нягледзячы на тое, што яму адарвала ступні ног самаробнай бомбай. Відаць, для перавязкі ён выкарыстаў кашулю.
Як паведамілі ў МУС, у выніку выбуху пацярпелі два чалавекі, абодва шпіталізаваныя. Mash піша, што жонцы сілавіка пасекла твар асколкамі. А сам мужчына ў рэанімацыі ў цяжкім стане.
«КоммерсантЪ» са спасылкай на свае крыніцы паведаміў імя пацярпелага сілавіка — гэта 49-гадовы Андрэй Таргашоў. Паводле інфармацыі выдання, справа распачатая па арт. 30 і 105 КК РФ — замах на забойства. Пасля яго могуць перакваліфікаваць на тэракт. Паводле звестак выдання, тратылавы эквівалент выбуховага прыстасавання складаў паўкіло.
Як пазней паведаміў тэлеграм-канал Baza, у Land Cruiser падарваўся не намеснік начальніка вайсковай часткі РВСН у Падмаскоўі, а яго цёзка па імені і прозвішчы. Ён не мае дачынення да гэтай вайсковай часткі, але пры гэтым таксама служыць ва Узброеных сілах РФ. Ён афіцэр штаб-кватэры ГРУ.