Украіна і Малдова могуць уступіць у Еўрасаюяз да канца наступнага мандата Еўрапейскай камісіі, то-бок да 2029 года. Пра гэта заявіў еўракамісар па пытаннях добрасуседства і пашырэння Олівер Вархеі, перадае Deutsche Welle.
Паводле яго, Еўракамісія стварыла дадатковыя інструменты, якія дапамогуць краінам Заходніх Балкан, Малдове і Украіне паскорыць правядзенне рэформаў. Гэтыя інструменты па-рознаму называюцца ў залежнасці ад дзяржавы — напрыклад, «План росту» і «План Украіны».
«З дапамогай гэтага плана мы зрабілі магчымым для Заходніх Балкан, Малдовы, а таксама для Украіны завяршыць рэформы, каб яны маглі ўсё падрыхтаваць і стаць сябрамі ЕС да канца наступнага мандата Еўрапейскай камісіі», — заявіў Вархеі.
Мандат Еўракамісіі доўжыцца пяць гадоў, наступны завершыцца ў 2029 годзе.
Нагадаем, у чэрвені 2022 года Украіна і Малдова атрымалі статус кандыдатаў на ўступленне ў Еўрапейскі саюз. У чэрвені 2024 года гэтыя краіны пачалі перамовы пра далучэнне да ЕС.
20 кастрычніка ў Малдове прайшли прэзідэнцкія выбары і адначасова з імі рэферэндум пра ўступленне ў ЕС. 50,46% выбаршчыкаў падтрымалі еўраінтэграцыю, супраць выступіла 49,54% удзельнікаў. Прэзідэнтка краіны Майя Санду заявіла, што ў Канстытуцыю краіны будуць унесеныя папраўкі, якія датычаць далучэння да ЕС.