У Літоўскім пункце пропуску «Мядзінінкай» (з беларускага боку — «Каменны Лог») 10 жніўня затрымалі фуру з кантрабанднымі ўседарожнікамі, паведамілі ў прэс-службе мытні Літвы.
Вялікагруз ехаў ва Узбекістан. Паводле дакументаў, у паўпрычэпе знаходзілася туалетная папера агульнай вагой 720 кг. Фуру адправілі на рэнтген, які выявіў схаваную кантрабанду.
Падчас агляду паўпрычэпа мытнікі знайшлі за скрынямі з туалетнай паперай тры ўседарожнікі Toyota Land Cruiser агульным коштам больш за 87 тысяч еўра.
«Кіроўца быў вельмі здзіўлены такой знаходкай і заявіў афіцэрам, што нічога не ведае пра сакрэтны груз», — паведамілі ў літоўскай мытні.
Па факце кантрабанды пачалі дасудовае расследаванне. Парушальніку пагражае штраф або пазбаўленне волі на тэрмін да васьмі гадоў. Кіроўцу дапыталі і адпусцілі на волю пад падпіску пра нявыезд.