Акторка тэатра-студыі кінаактора Ларыса Маршалава памерла пасля таго, як у яе адарваўся тромб. Пра гэта паведаміў расійскі тэлеграм-канал Shot са спасылкай на свае крыніцы.
Дактары не змаглі нічога зрабіць, і 44-гадовая артыстка заўчасна памерла.
Развітанне з Маршалавай пройдзе 14 ліпеня ў тэатры кінаактора ў Мінску.
Творчую дзейнасць яна пачала з маленькіх роляў. У пастаноўках «Ганна Снегіна», «Як выходзяць у людзі, або На ўсякага мудраца хапае прастаты», «Механічны чалавек» і «№ 13» Ларыса Маршалава грала галоўныя ролі.
Яна здымалася ў беларускіх і расійскіх фільмах і серыялах. На рахунку акторкі — дзясяткі карцін. Найлепшы фільм з Маршалавай у рэйтынгу «Кинопоиска» — «Шукаю цябе» 2010 года. У 2022 годзе выйшаў беларускі фільм «Забароненая група» з яе ўдзелам, сёлета — расійскі міні-серыял «Салавейка».